Өглөө.мн Шинэ өглөө, Шинэ мэдээлэл
Авто тээврийн болон өөрөө явагч хэрэгслийн албан татвар, агаарын бохирдлын төлбөр хураах ажил гуравдугаар сарын 1-нээс тавдугаар сарын 31-нийг хүртэл явагдаж дууслаа.
Энэ хугацаанд татварын газрууд төлөвлөгөөгөө биелүүлж ажилласан байна. Харин энэ сарын 10-наас эхлэн 14 хоногийн хугацаанд хяналтын үзлэг шалгалт хийхээр болжээ. Энэ ажлыг шинээр байгуулагдсан “Дүнжингарав” худалдааны төвийн талбайд явуулах болсон аж.
Өнгөрсөн жилүүдэд хяналтын үзлэг шалгалтыг тоос шороо бужигнасан, зай талбай багатай газар хийдэг байсан бол энэ удаа Европ стандартад нийцсэн, гаднах зогсоол талбай сайтай газар хийхээр болсныг Нийслэлийн татвар хураах төв комиссоос мэдээллээ.
Хуульд зааснаар авто тээврийн хэрэгслийн албан татвар болон агаарын бохирдлын төлбөрийг авто машин эзэмшигч бүр жилд нэг удаа зургаадугаар сарын 1-ний дотор төлөхөөр заасан байдаг.
Харин зургаадугаар сарын 1-нээс татвараа төлөөгүй тээврийн хэрэгслийг замын хөдөлгөөнд оролцуулахгүй байх журамтай аж.
Гэхдээ иргэдийн хэрэгцээ шаардлагыг бодолцож үзсэний үндсэн дээр зургаадугаар сарын 10-ныг хүртэл татвараа торгуульгүйгээр төлөх боломж олгожээ. Энэ хугацаанаас хэтэрвэл хяналт шалгалтаар илрүүлж, тогтоосон дүрмийн дагуу торгууль ногдуулж, татварыг нь төлүүлэх юм.
Баянзүрхчүүд тэргүүллээ
Нийслэлийн татвар хураах түр комиссоос авто тээврийн болон өөрөө явагч хэрэгслийн албан татвар, агаарын бохирдлын төлбөр хураах ажилд идэвх зүтгэлтэй ажилласан байгууллага, ажилтнуудад шагнал урамшуулал олгох болзол гаргажээ.
Нийт 12.5 сая төгрөгийн шагналын сантай энэхүү болзолт уралдаанд Баянзүрх дүүрэг тэргүүлж, Сонгинохайрхан, Баянгол дүүргүүд удаалсан байна. Харин Чингэлтэй, Налайх дүүрэг төлөвлөгөөгөө биелүүлээгүй аж.
Авто машины дугаар гол асуудал үүсгэжээ
Энэ жил нийслэлийн хэмжээнд нийт 206652 тээврийн хэрэгсэл татвараа хугацаанд нь төлжээ. Гэтэл Зам тээврийн яамны бүртгэлээс үзэхэд УБ дугаартай 300 мянга гаруй тээврийн хэрэгсэл байдаг аж.
Учир нь Улаанбаатарт бүртгэлтэй хэрнээ орон нутагт явдаг тээврийн хэрэгсэл цөөнгүй бий. Энэ нь 100 гаруй мянган тээврийн хэрэгсэл татварт хамрагдаагүй байна гэсэн үг.
Тиймээс УБ дугаартай авто машинуудыг цэгцлэх шаардлагатай. Үүнийг дагаад жилд хураах татварын хэмжээ бодитой болно гэдгийг Төв комиссын хуралдааны үеэр хэлж байв.
Мөн гадны орнуудад хуучин машинаа хаяхад хүртэл татвар хураамж төлдөг байхад манайх хаа тааралдсан жалга руу хаядаг нь гэмт хэрэг, аюулгүй байдал гарахад нөлөөтэй. Түүнчлэн нэг дугаар давхацсан тохиолдлууд ч цөөнгүй гарч байсан. Ийм ижил дугаартай машинуудын аль нэг нь татвараа төлөөд, бусад нь ард нь үлддэг үү гэсэн асуудал ч цаанаасаа урган гарч байгаа юм.
Үнэхээр ч авто машины дугаар гол асуудал болоод байна гэж Улаанбаатар хотын Ерөнхий менежер бөгөөд Захирагчийн ажлын албаны дарга Б.Бадрал хэлсэн.
Түүний мэдээлснээр төмөр дугаарыг өнгөөр нь ялгаж өгвөл нэгдүгээр эгнээнд явах, дугаарын хязгаарлалтад ороход дөхөм болно гэж байв. Үүнээс гадна Налайх, Багануур, Багахангайн машинууд УБ гэсэн дугаартай болбол яасан юм бэ гэсэн саналууд ч их ирдэг гэжээ.
Эдгээр асуудлуудтай холбоотойгоор нийслэлийн захиргаа Зам тээврийн яамтай хамтарч, УБ дугаарыг цэгцлэхэд хамтарч ажиллахаар төлөвлөж байгаа юм байна.
Эх сурвалж:
