Монгол–Солонгосын бизнес форум байгуулагдав

БНСУ–д албан ёсны айлчлал хийж буй Гадаад харилцааны сайд Л.Болдын айлчлал амжилттай өндөрлөлөө. Хоёр орны хоорондох эдийн засгийн харилцааг шинэ шатанд гаргаж, харилцан хөрөнгө оруулалтыг нэмэгдүүлэх зорилгоор байгуулж буй Монгол-Солонгосын бизнес форум байгууллагын түншлэлийн харилцан ойлголцлын санамж бичигт гарын үсэг зурах ёслолын ажиллагаанд тэрээр оролцож үг хэлэв.

Энэхүү форумыг хоёр талаас улс төр, бизнесийн нөлөө бүхий зүтгэлтнүүд нэгдэн байгуулж байгаагийн дотор Солонгосын Корейн Эйр, Самсунг, Хьюндай моторс, Поско, Дэйлим зэрэг томоохон корпорациудын удирдлага, БНСУ–ын Үндэсний Ассамблейн гишүүн Во Юн Кюүн, Ли Ли Жэй, Ким Тэй Нюүн, Инчён–2014 Азийн наадмыг зохион байгуулах хорооны дарга Жүон Хюн Хюй  нарын улс төрийн зүтгэлтнүүд ирсэн байлаа. Монголын талыг төлөөлөн санамж бичигт УИХ–ын гишүүн Г.Батхүү, ‘’Эрдэнэс Тавантолгой’’ ХК–ийн захирал Я.Батсуурь нар гарын үсэг зурав.

Мөн өдөр сайд Л.Болд БНСУ-ын Үндэсний Ассамблейн Хууль Зүйн байнгын хорооны дарга Пак Ёнг Сунгтай уузлаа. Уулзалтаар сайд Л.Болд БНСУ-д  зорчиж буй  манай иргэдийн тоо  жил бүр өсөн нэмэгдэж байнгаа хэдий ч иргэдийг БНСУ-д  зорчих виз авахад барьцаа мөнгө авч байгаа нь  явж буй иргэдэд хүндрэл учруулаад зогсохгүй нийт Монголчуудад  БНСУ-ын тухай буруу ойлголт төрүүлэх, хоёр улсын хооронд байгуулсан хэлэлцээрийг зөрчсөн үйлдэл болж байгаа тул барьцаа мөнгө авах асуудлыг зогсооход дэмжлэг үзүүлэхийг хүслээ.

Ноён Пак Ёнг Сунг хүсэлтийг хүлээн авч байгаагаа илэрхийлж ойрын хугацаанд холбогдох байгууллагуудад мэдэгдэж хэрхэн шийдвэрлэснийг Монгол Улсаас БНСУ-д суугаа Элчин Сайдын яамаар дамжуулан  албан ёсоор  хариу өгөхөө мэдэгдэв.

Харин түүний дараа сайд Л.Болдын уулзсан Үндэсний ассамблейн Гадаад бодлого, Үндэсний эв нэгдлийн байнгын хорооны дарга Ан Хон Жүн юуны өмнө эрүүл мэндийн шалтгаанаар зорчиж буй болон, Солонгост суралцагчдын ар гэрийнхний визийн шаардлагыг хөнгөвчлөх чиглэлээр Засгийн газартаа даруй арга хэмжээ авах чиглэл өгөхөө амлалаа.

Визтэй холбогдолтой энэхүү асуудал мөн Үндэсний Ассабмлейн Солонгос–Монголын найрамдлыг бүлгийн дарга Пак Ки Чүн тэргүүтэй парламентийн бүлгийн гишүүдтэй хийсэн уулзалтын гол сэдэв байв. Эдгээр уулзалтад Монголын талаас УИХ–ын гишүүн Г.Батхүү, ‘’Эрдэнэс Тавантолгой’’ ХК–ийн захирал Я.Батсуурь нар хамт оролцож хоёр талын парламентийн гишүүд иргэд зорчих нөхцлийг хөнгөвчилснөөр гарах нийгэм, эдийн засгийн үр дүнг онцлон тэмдэглэж байлаа. Солонгосын талаас Үндэсний Ассамблей дахь Солонгос, Монголын парламентын найрамдлын бүлгийн дэд дарга Ким Гван Рим, дэд дарга Ли Юн Сок, бүлгийн нарийн бичгийн дарга Ли Вөн Үк, Үндэсний Ассамблейн гишүүн Юн Сан Хён, Ассемблейн гишүүн Пак Жү Сон  нар уулзалтад оролцов.

БНСУ-д хийж буй албан ёсны  айлчлалынхаа хүрээнд Гадаад харилцааны сайд Солонгосын Үндэсний Дипломат Академийн үйл ажиллагаатай танилцаж академийн дарга Юн Дөк Мин-тэй уулзлаа. Тавь гаруй жилийн түүхтэй тус академи нь Солонгосын гадаад харилцааны салбарын ажилтнуудыг бэлтгэх, дадлагажуулах, давтан сургах болон эрдэм шинжилгээний үйл ажиллагаа явуулдаг гол төв бөгөөд НҮБ­­–ийн Ерөнхий нарийн бичгийн дарга Бан Ги Мүн зэрэг нэртэй дипломатчид төгсжээ. Уулзалтаар Монгол улсын Гадаад харилцааны яамны дэргэд байгуулахаар шийдвэрлээд байгаа Дипломат академийг бэхжүүлэх, залуу дипломатчдыг харилцан солилцож сургах зэргээр хамтран ажиллахаар тохиров.

Сайд Л.Болд айлчлалынхаа төгсгөлд дэлхийн хамгийн том чөлөөт бүс болно гэгдэж буй Инчён хотын эдийн засгийн чөлөөт бүсийн үйл ажиллагаатай танилцав.