Өглөө.мн Шинэ өглөө, Шинэ мэдээлэл
Нийслэл хотод өнгөрсөн жилээс зам талбайг зориулалтын техникээр угааж, замын хажуугийн нуухны шороо тоосыг соруулж цэвэрлэж байгаа нь дэрсэн шүүрээс дэвшилтэт технологид тэмүүлсэн томоохон алхам болсон. “Нийтийн үйлчилгээний Улаанбаатар нэгтгэл” ОНӨААТҮГ нь 2014 оны 04 дүгээр сарын 07-ны өдрөөс зам цэвэрлэгээний тусгай зориулалтын машинуудаа цэвэрлэгээнд гаргах гэж байна.
Уг машин нь нарийн гуурсаар ус цацаж, соруулдаг тул хасах градустай нөхцөлд ажиллах боломжгүй байдаг. Тиймээс цаг агаар дулаарч байгаатай холбогдон төлөвлөгөө гаргаж ажлуулах бөгөөд Энхтайваны өргөн чөлөө, Чингисийн өргөн чөлөө, Энэбишийн өргөн чөлөө, Сөүлийн гудамж, Их тойруу, Бага тойруу, Олимпийн гудамжийн замуудыг замын хөдөлгөөний ачаалал буурах цагаар буюу шөнийн 23 цагаас, өглөөний 06 цаг хүртэл цэвэрлэнэ гэж Нийтийн үйлчилгээний Улаанбаатар нэгтгэл ОНӨААТҮГ-аас мэдээллээ.
