Өглөө.мн Шинэ өглөө, Шинэ мэдээлэл
Монгол, Орос, Хятадын төрийн тэргүүнүүд шинэ он гарах мөчид улс орныхоо иргэдэд хандаж хэлсэн үгнээс онцлон хүргэж байна.
…Хамгийн гол нь хариуцлага, бүтээн байгуулалтыг эрхэмлэн ажиллацгаая. Энэ тухай саяхан бид УИХ, Засгийн газрын түвшинд тодорхой ярилцсан. Ирэх оны 1 дүгээр сарын 1-нээс Шилэн дансны хууль хэрэгжиж, түмний хөрөнгийг зарцуулах үйл явц нээлттэй, хяналттай болох цаг эхэлнэ.
Үүний араас Нийтийн сонсголын, Сонгогдсон болон томилогдсон албан тушаалтанд хариуцлага хүлээлгэх, Захиргааны, Иргэдийн оролцооны, Ирээдүйн өв сангийн тухай хууль зэрэг иргэдийнхээ эрх ашгийг дээдэлсэн, албан тушаалтанд үүрэг хариуцлагыг нь сануулсан, шударга ёсыг тогтооход жинтэй хувь нэмэр болохуйц олон хуулийг ирэх онд хэлэлцэн батлуулахаар төлөвлөж байна.
2015 он бол Монголчуудын хувьд алт шиг үнэ цэнэтэй, хором бүрийг нь алдалгүй ашиглах чухал он байх болно.
Цаг хугацаа бидэнд гадаадын мөнгөн тэмдэгтээс ч илүү үнэ цэнэтэй хамгийн чухал хөрөнгө оруулалт. Гарч буй шинэ жил ирээдүйн хөгжлийн 10 жилтэй тэнцэхүйц тийм үнэ цэнэтэй байх болно.
ОХУ-ЫН ЕРӨНХИЙЛӨГЧ ВЛАДИМИР ВЛАДИМИРОВИЧ ПУТИН:
…Хэн нэгнийг хайрлаж, хүчирхэгжүүлж, гэгээрүүлэх нь хамгийн сайхан мэдрэмжүүд юм. Тиймдээ ч Крым, Севастопол төрөлх орондоо эргэн нэгдэх шийдвэр гаргаж, ах дүүсээсээ тусламж хүссэн билээ. Энэ бол манай улсын түүхийн хувьд маш том үйл явдал юм.
Гарч байгаа жилдээ хүн бүр эх орныхоо хувь заяа, ашиг сонирхлын төлөө шударга, үнэнчээр хариуцлагатай зүтгэн ажиллаж, эв нэгдлийг эрхэмлэнэ гэдэгт итгэлтэй байна. Бидний тэмүүлж буй төлөвлөгөө, зорилго, мөрөөдөл бол аугаа юм.
Ирэх онд бидэнд нэлээд үүрэг хариуцлага ирж байна. Үүнд бүтээлчээр, үр дүнтэй ажиллаж, өмнөө тавьсан төлөвлөгөөгөө өөрсдийнхөө төлөө, өөрсдийн үр хүүхдүүд, Орос орныхоо төлөө хэрэгжүүлэх хэрэгтэй.
БНХАУ-ЫН ДАРГА СИ ЗИНЬПИН:
…Шинэ жил хаяанд ирлээ. Бид ард түмнийхээ хүсэл мөрөөдлийг бодит хэрэг болгож, аж амьдралд нь тусгахын төлөө чармайн ажиллах болно. Бид өөрчлөлт шинэчлэлийг тал бүрээр гүнзгийрүүлж, харвасан сум буцдаггүйн адилаар эрэмгий зориг гаргах болно. Бид хуулийн засаглалыг бүх талаар ахиулж, иргэдийн эрх ашгийг баталгаажуулан, нийгмийн шударга байдлыг хамгаалж, улс орны хөгжлийг ахиулна. Өөрчлөлт шинэчлэл, хуулийн засаглалыг бүх талаар гүнзгийрүүлэх ажлыг хөтөлгөө морь шиг зэрэг урагшлуулах замаар чинээлэг нийгмийг байгуулах зорилтоо товлосон хугацаанд нь биелүүлж чадна.
Иргэдийн амьдрал өдөр ирэх тусам өөдлөн дэвжиж байна. Гэвч ахуй амьдрал нь хүнд хэцүү маш олон иргэн байгааг бид цаг ямагт ухамсарлах болно. Тиймээс иргэдийн амьжиргаатай холбогдсон ажил, ялангуяа ядуусыг тэтгэн, ядуурлыг бууруулах, амьжиргааг нь баталгаажуулах ажлыг сайтар хийж, хөдөө орон нутаг, хот суурины ядуу иргэдэд амьжиргааны үндсэн баталгааг хангах нөхөн олговор өгч, халамж анхаарал тавина.
Бид намын сахилга батыг чангатгаж, үзэл суртлыг хэлбэрэлтгүй цэгцэлж, авлигатай хийх тэмцлийг үргэлжлүүлэн, Коммунист намын удирдсан социалист улс оронд авлигачдыг хатуу цээрлүүлнэ.
