Өглөө.мн Шинэ өглөө, Шинэ мэдээлэл
Монгол Улсын Үндсэн хуулийн 23 жилийн ойн өдрийг тэмдэглэн өнгөрүүлэх арга хэмжээний хүрээнд өнөөдөр /2015 оны нэгдүгээр сарын 13/ Улсын Их Хурлаас Б.Чимидийн нэрэмжит шагнал гардуулах ёслолын арга хэмжээ 11.00 цагаас Төрийн Ёслол хүндэтгэлийн Их Танхимд болно. Энэ үеэр Б.Чимидийн нэрэмжит бүтээлийн эзэнд Улсын Их Хурлын дарга З.Энхболд өргөмжлөл, Б.Чимидийн дүрс бүхий медаль, мөнгөн шагнал гардуулах юм. Ардчилсан шинэ Үндсэн хуулийн эхийг баригч, нэрт хуульч Б.Чимидийн нэрэмжит шагнал бий болгох журмыг Улсын Их Хурлын даргын 2014 оны арваннэгдүгээр сарын 18-ны өдрийн 176 тоот Захирамжаар баталсан байна.
Мөн өнөөдөр Монгол Улсын Их хурлын дарга Зандаахүүгийн Энхболд, УИХ-ын гишүүд, Засгийн газрын гишүүд, Ардын Их Хурлын депутатууд 11.40 цагаас Их эзэн Чингис хааны хөшөөнд хүндэтгэл илэрхийлэх ёслолын арга хэмжээ болох юм. Харин 14.00 цагт Үндсэн хуулийн 23 жилийн ойн өдөрт зориулсан Үндэсний бөхийн барилдаан Монгол бөхийн өргөөнд болно хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.
