Өглөө.мн Шинэ өглөө, Шинэ мэдээлэл
Улсын Их Хурлын 2014 оны намрын ээлжит чуулганы өнөөдрийн /2015.02.11.Лхагва гараг/ нэгдсэн хуралдаан 09 цаг 50 минутад 51.3 хувийн ирцтэй эхэлж, 7 асуудал хэлэлцэн шийдвэрлэхээр болов.
Чуулганы нэгдсэн хуралдаанаар эхлээд Үндэсний статистикийн хорооны даргыг томилох тухай асуудал хэлэлцэв. УИХ-ын дарга З.Энхболд Статистикийн тухай хуулийн 13 дугаар зүйлийн 1 дэх хэсэгт заасныг үндэслэн тус хорооны даргаар Сономцэрэнгийн Мэндсайханыг томилуулахаар санал болгож буйгаа танилцуулсан юм. С.Мэндсайханы мэргэжлийн бэлтгэл, ур чадвар, төрийн захиргааны байгууллагад удирдах албан тушаал хашиж байсан туршлагыг харгалзан энэ албан тушаалд томилуулахаар нэр дэвшүүлж буйгаа тэрбээр хэллээ.
Мөн энэ асуудлаар Эдийн засгийн байнгын хорооны санал, дүгнэлтийг УИХ-ын гишүүн Ж.Батсуурь танилцуулсан юм. Тус байнгын хороо өчигдрийн хуралдаанаараа Үндэсний статистикийн хорооны даргыг улираан томилох тухай асуудлыг хэлэлцээд дэмжжээ.
УИХ-ын даргын танилцуулга, Байнгын хорооны санал, дүгнэлттэй холбогдуулан гишүүд нэр дэвшигч болон Байнгын хорооны даргаас асуулт асууж тодруулан саналаа хэлсэн юм. Шинэчлэлийн Засгийн газар эдийн засаг хямраагүй, сайн сайхан байна гэсэн худал мэдээлэл өгсөөр эцэст нь улс орныг өнөөгийн эдийн засгийн хямралд хүргэсэн, энэ талаар Байнгын хороон дээр яригдсан эсэхийг УИХ-ын гишүүн О.Содбилэг тодруулсан юм. Энэ тухайд Байнгын хорооны дарга Ж.Батсуурь “Статистикийн байгууллагаас гаргаж буй эдийн засгийн байдал, үнэтэй холбоотой мэдээлэл худал ташаа байгаа эсэх тухай яриа Байнгын хорооны хуралдааны үеэр гараагүй. Харин байнгын хороо тус байгууллагын ажилтай танилцахдаа мэдээллийн бодит байдалд анхаарч эх сурвалжийг сайтар нягтлан нэг аргачлалаар авч байх чиглэл өгсөн” гэсэн хариулт өгөв.
Харин нэр дэвшигч С.Мэндсайхан “Хямралтай холбоотой мэдээллийг буруу өгсөн гэдэгтэй санал нийлэхгүй байгаа. Өнгөрсөн хугацаанд өгч байсан бүх мэдээлэл үнэн зөв гэдгийг хэлэхийг хүсч байна. Тус газар хуулиараа 48 төрлийн мэдээллийг 400 гаруй үзүүлэлтээр тооцож гаргадаг” гэлээ. Мөн УИХ-ын гишүүн М.Энхболд, Б.Гарамгайбаатар, Л.Цог, Г.Баярсайхан, Д.Ганбат нар нэр дэвшигчээс асуулт асууж тодруулан саналаа хэлэв. Тухайлахад гишүүн Б.Гарамгайбаатар “С.Мэндсайхан нь тус хорооны даргаар ажиллах хугацаандаа улс төрийн өнгө аястай мэдээлэл гаргаж байгаагүй гэдгийг би Эдийн засгийн байнгын хорооны даргаар ажиллаж байсны хувьд нотолно. Хуулийн дагуу үнэн зөв мэдээлэл авах боломжийг энэ байгууллага бүрдүүлж чадсан” гэдгийг хэлж байв. Нэр дэвшигч С.Мэндсайхан “Ер нь статистикийн мэдээлэл нь улс төрийн болон бусад аливаа сонирхлоос ангид байх ёстой. Би энэ зарчмыг барьж ажиллаж ирсэн. Хэрэв гаргасан мэдээ, мэдээлэл маань алдаатай байх юм бол хариуцлага хүлээхэд бэлэн байна” гэдгээ нэмж тодотгосон юм.
Ингээд Үндэсний статистикийн хорооны даргаар С.Мэндсайханыг улируулан томилох тухай Байнгын хорооны саналын томьёоллоор санал хураалт явуулахад чуулганы нэгдсэн хуралдаанд оролцсон 46 гишүүний 42 нь буюу 91.3 хувь нь дэмжлээ.
Дараа нь Авлигатай тэмцэх газрын дэд даргыг томилох тухай асуудал хэлэлцэж, Монгол Улсын Ерөнхийлөгчийн саналыг Монгол Улсын Ерөнхийлөгчийн Хүний эрх, хуулийн бодлогын зөвлөх Ч.Өнөрбаяр, Хууль зүйн байнгын хорооны санал, дүгнэлтийг УИХ-ын гишүүн Л.Болд нар танилцуулав. Хууль зүйн байнгын хороо өчигдрийн хуралдаанаараа энэ асуудлыг хэлэлцээд Ц.Нямдоржийг Авлигатай тэмцэх газрын дэд даргаар томилохыг дэмжсэн юм.
Тус газрын дэд даргын албан тушаалд төрийн албанд 10-аас доошгүй жил ажилласан эрх зүйч мэргэжилтэй, гүйцэтгэх болон мөрдөн байцаах ажлын мэдлэг туршлагатай, сүүлийн таван жилийн хугацаанд улс төрийн албан тушаал эрхэлж байгаагүй иргэн байх ёстой гэсэн хуулийн заалттай. Нэр дэвшигч Ц.Нямдорж нь 1999-2009 онд Тагнуулын ерөнхий газарт ажилтан, ахлах ажилтан, тасгийн дарга, 2009-2011 онд УИХ-ын Аюулгүй байдал, гадаад бодлогын байнгын хорооны зөвлөх, 2011 оноос Авлигатай тэмцэх газарт Гүйцэтгэх ажлын хэлтсийн 1 дүгээр тасгийн дарга, Гүйцэтгэх ажлын хэлтсийн даргаар ажиллаж байгаа аж.
Ерөнхийлөгчийн санал, Байнгын хорооны санал, дүгнэлттэй холбогдуулан УИХ-ын гишүүн О.Баасанхүү, Ц.Даваасүрэн, Ц.Оюунбаатар, Ц.Оюунгэрэл, Ц.Нямдорж, Л.Энх-Амгалан, Г.Баярсайхан, О.Болд, Б.Бат-Эрдэнэ, Л.Цог, Д.Сарангэрэл нар Ерөнхийлөгчийн зөвлөх болон нэр дэвшигчээс асуулт асууж тодруулан саналаа хэллээ. Нэр дэвшигч Ц.Нямдорж гишүүдийн асуултад өгсөн хариултдаа, манай улсын тухайд олон улсын байгууллагын судалгаагаар сүүлийн гурван жилд авлигын индекс буурсан үзүүлэлттэй байгаа. Цаашид энэ үзүүлэлтийг бууруулах үүднээс авлигаас урьдчилан сэргийлэх, соён гэгээрүүлэхэд анхаарч, хуулийн хүрээнд ажиллана гэдгээ илэрхийлэв. Асуулт асууж, үг хэлсэн гишүүд ч хуулийг чанд мөрдөж, хүний эрх, шударга ёсыг сахиж улс төрөөс ангид ажиллах, авлигаас урьдчилан сэргийлэх, олон нийтийг соён гэгээрүүлэх чиглэлд онцгой анхаарч ажиллахыг нэр дэвшигчид захилаа. Эцэст нь Байнгын хорооны саналаар санал хураалт явуулахад нэгдсэн хуралдаанд оролцсон 51 гишүүний нь 41 буюу 80.4 хувь нь Цээсүрэнгийн Нямдоржийг Авлигатай тэмцэх газрын дэд даргаар томилохыг дэмжлээ.
Чуулганы нэгдсэн хуралдаанаар яг одоо Ашигт малтмалын тухай хуульд нэмэлт оруулах тухай хуулийн төслийн хэлэлцэх эсэх асуудлыг хэлэлцэж байна гэж Улсын Их Хурлын Тамгын газрын Хэвлэл мэдээлэл, олон нийттэй харилцах хэлтэс мэдээлэв.
