Өглөө.мн Шинэ өглөө, Шинэ мэдээлэл
Монгол Улс, БНХАУ хоорондын стратегийн иж бүрэн түншлэлийн хамтын ажиллагаа, хоёр улсын төрийн тэргүүнүүдийн уулзалтын үеэр ярилцаж тохиролцсон асуудлын хүрээнд 2 улсын хилээр хөдөө аж ахуйн гаралтай бүтээгдэхүүнийг нэвтрүүлэх ажлыг эрчимжүүлэхээр Хүнс, хөдөө аж ахуйн дэд сайд Б.Батзориг тэргүүтэй албаны хүмүүс ӨМӨЗО-д ажиллаж байгаа билээ.
Айлчлалын хүрээнд манай төлөөлөгчид ӨМӨЗО-ны Хойд хэсгийг хөгжүүлэх ажлын хэсгийн байнгын хорооны орлогч дарга Бао Гуан Линь, Худалдааны танхимын орлогч дарга бөгөөд Хил боомтын дарга Гуо Ган, Хяналт шалгалт, хорио цээрийн газрын дарга Жань Шао Тун зэрэг албаны хүмүүстэй уулзаж, Бичигт-Зүүн хатавч, Сүмбэр- Рашаан, Баянхошуу- Өвдөг боомтын үйл ажиллагаатай танилцлаа.
Хоёр тал Монгол Хятадын хил орчмын мал аж ахуй, газар тариалангийн салбарын хамтын ажиллагааг хөгжүүлэхэд тодорхой ажлуудыг төлөвлөж, хамтран ажиллах санамж бичигт гарын үсэг зурлаа. Энэхүү санамж бичигт хил боомтын үндсэн болон дэд бүтцийн бүтээн байгуулалтыг эрчимжүүлэх, үр тариа малын тэжээл, мах, махан бүтээгдэхүүнийг экспортлох, импортлох үеийн хяналт шалгалт хорио цээрийн нөхцлийг ижилсүүлэх, техник технологи болон тоног төхөөрөмжийг сайжруулах, боловсон хүчнийг чадавхижуулах зэрэг асуудлыг шийдвэрлэхээр тусгажээ.
Түүнчлэн хамтын ажиллагааны хүрээнд ХАА-н гаралтай бүтээгдэхүүний боловсруулах үйлдвэрийн бүсийг байгуулахад Хятадын талаас дэвшилтэт техник технологи, машин механизм, тоног төхөөрөмжийг нийлүүлэх мөн техникийн мэргэжилтнүүдийг харилцан солилцож, мэргэжил дээшлүүлэх тал дээр хамтран ажиллахаар тохиролцлоо.
