Өглөө.мн Шинэ өглөө, Шинэ мэдээлэл
Дэлхийн оюутны зуны Универсиад их наадам БНСУ-ын Гванжу хотноо 2015 оны 7 сарын 3-14-нд болно. Наадамд оролцох Монголын баг тамирчдыг үдэн гаргах ёслолын ажиллагаа өнөөдөр Монгол улсын их сургуулийн 1 дүгээр байрны “Дугуй танхим”-д боллоо. Оюутнууд дөнгөж эрдмийн танхимын хичээлээ өндөрлөн улс эх орноо төлөөлөн тэмцээний талбарт өрсөлдөхөөр бэлэн болсон байв. Анх удаагаа МУИС-ийн эрдмийн “дугуй танхим”-д Универсиад наадамд явах 12 спортын төрлийн тамирчид, дасгалжуулагч, албаны төлөөлөгчид нь цугларсан байлаа. Универсиад 2015 наадамд явах тамирчид, дасгалжуулагч нар наадмын нээлтийн ёслолд өмсөх нэгдсэн хувцастайгаа хүрэлцэн ирж жигдрэн суусан байсан юм.
Дугуй танхимд Универсиадын тамирчидад амжилт хүссэн анонс байрлуулан, өмнөх наадмын зарим зургууд тавьж, төрийн далбааг хойморт нь залж чимэглэсэн байна.
