“Авьяаслаг монголчууд” алсын хараатай бол бүр сайхан

Монгол HD телевиз дэлхийд алдартай шоуны монгол хувилбарыг бүтээж, үзэгчдийг байлдан дагуулж байна. Үүний цаана ямар их хүч хөдөлмөр, хөрөнгө санхүү, хичээл зүтгэл байгаа нь ойлгомжтой.
Энэ шоу нэвтрүүлэг гарах үеэр монгол үзэгчид зурагтын дэлгэц рүүгээ ойртож, дараа нь цахим орчин тухайн нэвтрүүлэг ямар болсон тухай чөлөөт хэлэлцүүлгээр дүүрч байгаа нь нийгмийн анхаарлыг татсан нэвтрүүлэг болж чадаж байгааг харуулж байна.

Цаашид энэ шоуг илүү сайн болгох үүднээс хоёр санал хэлмээр байна. Сэтгүүлзүй, хэвлэл мэдээллийн салбар бол нийгмийн өмнө хариуцлага хүлээсэн онцгой салбар гэх үгийг би олонтаа сонсож байсан. “Авьяаслаг монголчууд”-ыг хараад энэ үнэхээр үнэн болохыг анзаарлаа. Солонгосын хэрүүлийн бузартай цуврал кинонд автсан үзэгчдийн анхаарлыг өөртөө татаж чадсан энэ нэвтрүүлэгт үнэхээр давуу тал хэд хэд байна. Нэгдүгээрт, энэ бол монгол нэвтрүүлэг. Үзэгч, оролцогч, шүүгч, хөгжөөн дэмжигчдийн сэтгэл хөдлөлийг дээд цэгт нь тулгах боломжтой, монгол хүнээр бахархах бахархлыг өдөөсөн сайн шоу. Тийм болохоор энэ шоунд алсын хараатай бодлого хэрэгтэй санагдаж байна. Тэр нь юу вэ? Тэр бол хамгийн олон монгол үзэгчийг татаж чадаж байгаа давуу талаа ашиглан үзэгчдийг соён гэгээрүүлэх, танин мэдүүлэх, хүмүүжүүлэх үүргийг аль болох ихээр хиймээр байна. Шүүгчдийн хэл яриа нь зөв баймаар байна. “Аягүй гоё”, “Аймаар гоё” гэж дуу алдаад байвал монгол хэлний доройтолд л хувь нэмэр оруулна. Харин буруу ярьж байгаа оролцогчийн хэл яриаг засаад “Ингэж хэлж ярьж байгаарай” гэдэг шүүгч, хөтлөгчтэй бол монгол хэлээ аврах сайн үйлсэд энэ шоу чухал үүрэг гүйцэтгэнэ. Олны танил, шүтээн болсон хөтлөгч, шүүгчид зөв ярих нь эх хэлээ хамгаалах алсын хараа юм.

Хоёрдугаарт, хөтлөгчид маань энтертаймент маягийн хөтлөлт дундаа нийгэмд хандсан зөв мессежүүд өгдөг байвал тэднийг шимтэн үзэж, дагаж дуурайдаг хүүхэд залуучуудын хувьд хүмүүжлийн их ач холбогдолтой баймаар санагдана.
Гуравдугаарт, шалгаруулалт шүүлт алсын хараатай байх нь маш чухал. Энэ бол зөвхөн монгол шоу биш. Энэ бол дэлхийн олон оронд хийгдэж байгаа шоу. Орон орны хамгийн шилдгүүд цугларах үед монголчууд юугаараа давуу байж чадах бол гэсэн алсын хараа сонгон шалгаруулалтад хэрэгтэй санагдана. Монголчууд дэлхийн тавцанд авьяасаараа өрсөлдвөл юугаар ялагч болж чадах бол? Илбээр хэсэг хүнийг гайхашруулж болох ч дэлхий энэ төрөлд биднээс хол түрүүлсэн, бид дагаж яваа улс. Орчин үеийн бүжиг үү? Магадгүй. Гэхдээ дэлхийн шоу ертөнц энэ талаар мөн ч хол хөгжсөн дөө. Тэдэн дундаас ялгарах бас л хүнд. Орчин үеийн дууны төрлүүдээр үү? Бас л асуудалтай. Өрсөлдөөн бүр ч их. Монголчууд мөн л араас нь дагаж яваа төрөл. Тэгэхээр юу үлдэж байна? Монголчуудын хамгийн сайн чаддаг, бусдын төдийлөн чаддаггүй, эсвэл бидэнтэй өгөө аваатай байдаг зүйл л үлдэнэ. Энэ бол уран нугаралт, язгуур урлагийн төрлүүд, монгол бүжиг зэрэг цөөн хэдэн зүйл.

Уран нугаралт дэлхийд сүрхий хөгжиж байгаа ч монголчууд маань энэ төрөлд манлайлагч хэвээр байгаа нь өөрөө боломж юм. Харамсалтай нь уран нугаралтын “Нарны охид” хамтлагийг эрхэм шүүгчид хэрэггүй гээд шилдэг 8-д багтаалгүй хасчихсан. Алсын хараатай хандах хоёрдахь төрөл нь язгуур урлаг. Хэн ч дуурайгаад олигтой амжилтад хүрэхгүй, зөвхөн монгол хүний цусанд байдаг зүйлээрээ л бид дэлхийн чихийг дэлдийлгэж чадна. Тэр бол язгуур урлаг. Зөвхөн монгол бүжгийг л аваад үзье. Ямар өвөрмөц, уран налархай, цоглог, сэтгэл хөдөлгөм билээ дээ? Үүнийг зөвхөн бид л хийж чаддаг. Тэр бүү хэл уг гарал нэгтэй Өвөр Монгол, Буриадын бүжигчид ч манайхны техникийг бүрэн дүүрэн эзэмшиж чадахгүй байгаа нь монгол туургатнуудын хамтарсан тоглолт, урлагийн арга хэмжээний үеэр тод анзаарагддаг. Бусад орныхон бол яаж тэгж уян налархай хөдлөөд байгаа учрыг нь ч олохгүй нүдээ бүлтийлгэн, толгой сэгсэрдэг. Тийм болохоор “Авьяаслаг монголчууд” шоуны эрхэм шүүгчид эцсийн хариуцлагатай мөчид сэтгэл хөдлөлд авталгүй, алсын хараатай байж Монголын нэрийг дэлхийд гаргах тийм л үзүүлбэрийг шилдгээр нь сонгоосой гэж хүснэ.

“Авьяаслаг монголчууд” шоуг улам сайн, Монголд хэрэгтэй, монголчуудад илүү их тустай шоу байгаасай гэсэндээ үүнийг бичлээ. Яагаад гэвэл Монгол HD телевизийн хамт олон дэлхийн хэмжээний шоуг оруулж ирснээрээ ийм боломжийг бий болгож байна. Тэдэнд гүнээ талархая. Бас алсын хараатай байх саналыг минь хүлээн авч, ирээдүйд хийх том төслүүддээ бодлого болгохыг хүсье. Том ажил тэд хийж байна. Том ажил гэдэг том хариуцлага, бас том бодлогыг шаардах юм даа.

эх сурвалж: duuren.mn