УБ-ын дэвжээнд бөхчүүд шинэ өмсгөлтэй барилдана

Бөхийн спортыг төгөлдөржүүлэх зорилгын хүрээнд ДБНХ-ноос бөхийн өмсгөлийн шинэчилсэн загвар батлан гаргасныг олон нийтэд өнөөдөр тус холбооны Швейцар улс дахь Төв байранд танилцуулав. Бөхчүүд нь өөрийн орны далбааны өнгөөр чимэглэсэн, цэнхэр, улаан өнгийн өмсгөлтэйээр барилдаж байх болжээ. Өмсгөлийг тухайн орны далбааны өнгөөр чимэглэснээр улс орныхоо төрийн билэгдлийг ашиглах боломжийг үндэсний бөхийн холбоодод олгож байгаа ажээ.

Өмсгөлийн энгэр талд тухайн орны нэрний товчлол, үндэсний далбаа байна, харин ар нуруунд нь тухайн орны нэрний товчлол, бөхийн нэр байна.

“Бөхчүүдийн шинэ өмсгөл нь барилдааныг илүү сонирхууштай болгоно гэдэгт бид итгэж байна. Манай холбооны зүгээс ОУОХ-ноос гаргасан зөвлөмж болон бөхийн спортыг олимпийн хөтөлбөрт байлгах зорилтуудын хүрээнд бөхийн спортод шинэчлэл хийсээр байх болно.” гэсэн тайлбарыг ДБНХ-ны ерөнхийлөгч Н.Лалович хийжээ.

Улаанбаатар болон Стамбул хотуудад болох олимпийн сонгон шалгаруулалтын тэмцээнүүдэд бөхчүүд шинэ өмсгөлтэйгээр дэвжээнд гарах юм.