Цагт 50 төгрөгийн цахилгаан зарцуулдаг халаагуур бүтээжээ

“1998 онд үйлдвэрлэсэн сансрын хиймэл дагуулын халаагуураас санаа авч, цахилгаан эрчим хүч бага зарцуулдаг халаагуур хийх зорилготойгоор олон жилийн туршилт, судалгааны үр дүнд шинэ төрлийн халаагуур зохион бүтээж чадлаа. Харахад энгийн паар мэт боловч шинжлэх ухаан, технологийн ололт юм. Битүүмжилсэн халаагуур нь ижил төрлийн халаагуураас дөрөв дахин бага эрчим хүч зарцуулна” гэж тус компанийн зөвлөх Н.Даваа Ерөнхий сайдад танилцууллаа. Уураар халаах зарчимд тулгуурлан бүтээсэн энэ халаагуураар гэр, орон сууц, албан байгууллага, үйлдвэрлэл, үйлчилгээний газруудын дулааны хангамжийг эрчим хүчний бага зардлаар бүрэн шийдэх боломжтой юм байна.

Битүүмжилсэн халаагуур +75 хэм хүртэл халж, цагт 50 төгрөгийн цахилгаан зарцуулдаг ажээ. Мөн монгол гэрт зориулсан халаагуур бүтээж туршсан нь үр дүнтэй болж, цаашид үйлдвэрлэлд шилжүүлэхэд бэлэн болсон байна. Гэр хорооллын оршин суугчдын дулааны хангамжийг хямд үнэтэй, эрчим хүчний хэмнэлттэй халаагуураар шийдэж, утааг багасган нийслэлийн агаарын бохирдлыг бууруулахад чухал нөлөө үзүүлэх эдгээр төхөөрөмжийг цаашид олноор үйлдвэрлэхэд Засгийн газраас дэмжлэг үзүүлж, үйлдвэр байгуулахад шаардагдах хөрөнгийн эх үүсвэрийг шийдвэрлэж туслахыг компанийн удирдлагууд Ерөнхий сайдаас хүслээ.

Ерөнхий сайд Ч.Сайханбилэг айл өрхийг хямд үнэтэй халаагуураар хангах нь Улаанбаатар хотын агаарын бохирдлыг бууруулж, эрүүл цэвэр орчин бүрдүүлэхэд ач холбогдолтойг онцлоод үйлдвэр байгуулахад шаардагдах хөрөнгийн эх үүсвэрийн зээлийг судалж, шийдвэрлэхийг Хөгжлийн банкны гүйцэтгэх захирал Н.Мөнхбатад үүрэг болголоо. Мөн халаалт, эрчим хүчний шинэ системийг айл өрхөд нийлүүлэх, түгээх ажилд дэмжлэг үзүүлж ажиллахыг нийслэлийн Засаг дарга бөгөөд Улаанбаатар хотын Захирагч Э.Бат-Үүлд даалгалаа. Үйлдвэрлэл эхэлснээр тус компани ирэх есдүгээр сар хүртэл 45 мянган ширхэг халаагуур үйлдвэрлэх боломжтой болох юм.

Эх сурвалж: MNB.mn