Б.Ойдов: Монгол цэрэг

Гахай хадрах, нохой хэрэх, цүүц хатгах
Гайхамшигт цэргийн урлагийг ганцхан дайралтаар ноцож
Бухар, Самарканд, Арабын ертөнцийг донсолгосон
Будант тэнгэрийн зардас-Эзэнт гүрний монгол цэрэг

Чиг зүггүй тэмцэлдсэн Баруун, Зүүн гурван түмнийг
Чинхүү дайчин ухаанаар амиа золин нэгтгэж
Чингисийн төрийн голомтыг дахин сэргээж бадраасан
Чилгэр баатруудын өлгий-Мандухай хатны монгол цэрэг

Мах цусны тасархай-Амарсанаа, Чингүнжавын уухайгаар
Магад үнэний баталгаа, тусгаар тогтнолоо сэргээхээр
Махир сэлмээ эргүүлээд “Бээжин ноёд”-ыг сандаргасан
Мятрашгүй тэмцлийн манлай-Манжийн үеийн монгол цэрэг

Үндэсний эрх чөлөөний арван нэгэн оны тэмцэл
Өвөрлөгч түмнээ чөлөөлөх “Гурван замын байлдаан”-д
Өрлөг жанжин хийгээд “Манлай”, “Хатан” баатруудыг
Үнэнхүү зоригоор нь тодруулсан-Богд хааны монгол цэрэг

Манарсан дайны хөлд сүйдсэн улсаа аврахаар
Намирсан тугийн дор сүрлэг жагсаалаар хөдөлж
Нөмөрсөн гамин, бароныг сүрэглэн довтолж хөнөөсөн
Нүргэлсэн хувьсгалын уухай-Сүх жанжны монгол цэрэг

Баруун, зүүн хязгаарыг элбэн тохинуулахын хамтаар
Байтаг богд, Халхын гол, Чөлөөлөх дайны
Баатарлаг гавъяа шагналыг энгэр дүүрэн яралзуулсан
Бадрангуй тэмцлийн буухиа-Дөчөөд оны монгол цэрэг

Дарийн утаа, хүйтэн дайны аюулыг сөрж
Дархан хилээ нүд цавчилгүй манахын сацуу
Дардан зам тавьж, үйлдвэр барилга сүндэрлүүлсэн
Давшингуй хөгжлийн талбар-Далаад оны монгол цэрэг

Тэнгис далай, сансар огторгуйд хөрвөх чадал бүхий
Тив дэлхийн шилдэг дайчидтай мөр зэрэгцэж
Африкийн шугуй, Арабын цөлийг ажиггүй туулаад ирсэн
Амгалан энхийг сахиулагч-Өнөө цагийн монгол цэрэг

Хүлэг морьдоо цуцтал хүйхрэн довтолж явсан
Хөндий талыг доргитол хөнөөлдөн тэмцэлдэж ирсэн
Хүн гүрнээс улбаатай хүчирхэг монгол цэргийн
Хөгжил дэвшил, туулсан замнал хосгүй яа!

Эх сурвалж:zaluu.com