Хятад Улс Монголоос өвс бэлтгэж экосистемээ хамгаална

Хятад Улс Монгол Улсын Сүхбаатар аймгийн зарим сумдын нутгаас хадлангийн өвс бэлтгэх болсон. Эх сурвалжуудын хэлж буйгаар, Хятадууд аймгийн удирдлагуудтай нэлээд хэдэн жилийн тохироо хийж, Монголын нутгаас хайр гамгүй хадлан тэжээл бэлтгэх болсон байна. Ингэхдээ хятадууд аймаг, сумын төвд ганц нэгхэн хоёр давхар барилга барьж өгөөд оронд нь Монголын газар нутгийг нэлээд хэдэн жил ашиглан хадлан хадахаар болсон гэнэ. Өнгөрсөн жилээс эхлэлтэй Монголоос хадлан тэжээл бэлтгэх явдлыг хятадууд ихэд сайшааж, Монголын өвс тэжээл сайн чанартай хэмээн ам уралдацгаах болсон байна. Ерөнхийдөө Өвөр Монголчуудын нэрийг барьсан, тэдэнд тулгараад буй өвс тэжээлийн хомсдлыг арилгахад туслах зорилгоор Монголоос хадлан хадах энэхүү ажлын хүрээнд өнгөрсөн жил л гэхэд Монголын нутгаас 74.9 мянган тонн өвс хадаж авсан аж. Гэхдээ саяхан Хятадын нэгэн хэвлэлд Монголоос өвс хадаж байгаа явдлыг дотоодын экосистемээ хамгаалах үүднээс хийж буй ажил хэмээн тэмдэглэсэн байна.

Эх сурвалж:Undesten.mn