Дадлагажигчаар ажиллах залууст зориулсан япон хэлний сургалт эхлэв

Монгол Улсын Засгийн газраас хэрэгжүүлж байгаа “Сайн дадлагажигч” хөтөлбөрийн хүрээнд Япон улсад ур чадварын дадлагажигчаар ажиллах залуучуудын япон хэлний эхний ээлжийн сургалт өнөөдрөөс эхлэв. Энэхүү сургалтын талаар Хөдөлмөрийн яамны Мэргэжлийн боловсрол, сургалтын бодлого зохицуулалтын газрын дарга Б.Алтанжаргал хэлэхдээ “Японд дадлагажигчаар ажиллах хүсэлтэй залуусыг япон хэлний сургалтад бүртгэсэн. 18-39 насны, их, дээд сургууль, политехник коллеж, МСҮТ төгссөн хүмүүсийг сургалтад хамруулж байгаа” гэлээ.

 Мөн эхний ээлжийн сургалт Хөдөлмөрийн яамны харьяа, гурван политехник коллеж дээр эхэлсэн байна. Ажлын өдрүүдэд өглөө 9:00 цагаас өдөр 13:00 цаг хүртэл үргэлжлэх хуваариар гурван сарын хугацаанд явагдах юм.

Уг сургалт нийт 360 цагийн япон хэлний хичээл үзэж, анхан болон ахисан анхан шатны ярианы, сонсголын, бичгийн, дүрмийн чадварыг эзэмших ёстой аж.