Өглөө.мн Шинэ өглөө, Шинэ мэдээлэл
Нийслэлийн цэцэрлэгийн үйлчилгээний хүртээмжийг нэмэгдүүлэх, ашиглалтгүй сул ортой ажиллаж байгаа төрийн бус өмчийн цэцэрлэгүүдийн үйл ажиллагааг дэмжих замаар Монгол Улсын Засгийн газраас дэвшүүлж буй “Хүүхэд бүрийг цэцэрлэгт” зорилтыг хэрэгжүүлэх үйл ажиллагааны хүрээнд цэцэрлэгийн нэмэлт элсэлт зохион байгуулахаар боллоо.
2016-2017 оны хичээлийн жилд сургуулийн өмнөх боловсролд төрийн өмчийн 214, төрийн бус өмчийн 404, нийт 618 цэцэрлэг үйл ажиллагаа явуулж байгаа нь өнгөрсөн хичээлийн жилээс цэцэрлэгийн тоо 54, хүүхдийн тоо 7828-аар нэмэгдсэн байгаа хэдий ч нийслэлийн хэмжээнд цэцэрлэгийн хүртээмж хангалтгүй байсаар байна.
УИХ-ын ээлжит бус чуулганаар хэлэлцсэн Монгол улсын 2016 оны төсвийн тодотголд Нийслэлийн Боловсролын газраас оруулсан саналын дагуу цэцэрлэгт хамрагдаж чадахгүй байгаа хүүхдүүдийг нэмж хамруулах зорилгоор нийслэлийн сургуулийн өмнөх боловсролын салбарт 1425,3 сая төгрөгийг баталж 3087 хүүхэд нэмж элсүүлэх боломжтой боллоо.
Иймд цэцэрлэгийн хүрэлцээ хангалттай бус, элсэлтэд хүндрэл үүссэн зарим төрийн өмчийн цэцэрлэг дээр төрийн болон төрийн бус өмчийн цэцэрлэгийн багш,удирдлага, хороодын төлөөлөл оролцсон ажлын хэсэг ажиллаж “Нийслэлийн төрийн бус өмчийн цэцэрлэгт хүүхдийн нэмэлт бүртгэл, элсэлтийг зохион байгуулах ажлын удирдамж”-ийн дагуу 2016 оны 09 дүгээр сарын 20-ны өдрөөс 09 дүгээр сарын 21-нийг дуустал бүртгэл хийнэ. Удирдамж болон хуваарь,бүртгэл явуулах цэцэрлэг, бусад мэдээллийг www.edub.edu.mn -аас үзнэ гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
