Ц.Даваацэрэн: “Эрдэнэт үйлдвэр” нэг ч ажилтнаа цомхотгохгүй

2016 оны 10 сар 8 / 13 цаг 27 минут Мэдээ мэдээлэл, Нийгэм

Ерөнхий сайд Жаргалтулгын Эрдэнэбат Орхон аймагт ажилласан хоёр дахь өдрөө “Эрдэнэт үйлдвэр” ХХК-ийн үйл ажиллагаатай танилцлаа. Тус компаниас танилцуулга хийхдээ дэлхийн зах зээл дээр зэсийн үнэ тогтмол буурсан ч сүүлийн гурван жил гаруйн хугацаанд 330 тэрбум төгрөгийн цэвэр ашиг олсон гэдгээ онцоллоо. Энэ хугацаанд улсын төсөв 1.5 их наяд, орон нутгийн төсөвт 279 тэрбум төгрөгийг төвлөрүүлсэн гэнэ. Мөн өнгөрсөн онд 31.6 сая тонн хүдэр олборлож 28 саяыг олборлосон бол 546.2 мянган тонн зэсийн баяжмал, 5207 тонн молибдены баяжмал үйлдвэрлэсэн нь түүхэн дээд амжилт гэлээ.

Тус компанийн Ерөнхий захирал Ц.Даваацэрэнгээс сэтгүүлчид 49 хувийг хувьчилсантай холбоотойгоор орон тоо цомхотгох эсэх талаар асуухад тэрээр, “Удирдлагын бүтэц данхайсан зардал өндөртэй байсан нь өөрчлөгдсөн. Гэхдээ ажилчдыг цомхтгох талаар ямар нэгэн шийдвэр гараагүй. Нэг ч ажилтныг цомхотгохгүй” гэсэн юм.

Ерөнхий сайд Ж.Эрдэнэбат тус үйлдвэрийн үйл ажиллагаатай танилцах үеэрээ сэтгүүлчдэд өгсөн мэдээлэлдээ “Эрдэнэт үйлдвэр бол Монгол Улсын зууны манлай бүтээн байгуулалт. Засгийн газар уг үйлдвэртэй холбоотой өөрийн байр суурийг илэрхийлсэн шийдвэрийг гаргасан байгаа. Энэ нь Монголын төр өөрийн эзэмшлийн эрхийг ТУЗ болон гүйцэтгэх удирдлагын түвшинд хэрэгжүүлнэ. Тиймээс Эрдэнэт үйлдвэрийн үйл ажиллагаа цаашид хэвийн үргэлжилнэ гэж ойлгож болно” гэлээ. Мөн эдийн засгийн хүнд нөхцөлд өртөг, зардлаа бууруулж ашиг орлогоо нэмэгдүүлсэнд тус үйлдвэрийн хамт олонд талархаж буйгаа илэрхийллээ.

Засгийн газрын Хэвлэл, мэдээлэл, Олон нийттэй харилцах алба

Ц.Даваацэрэн: “Эрдэнэт үйлдвэр” нэг ч ажилтнаа цомхотгохгүй

Холбоотой мэдээ

Санал болгох мэдээ