НИТХ-ын даргад бодлогоор нэр дэвшсэн Д.Баярсайхан МАН-ын гишүүдэд таалагдсангүй

Өнгөрсөн 7 хоногийн сүүлээр НИТХ–ын Ц.Сандуй ажлаасаа чөлөөлөгдөх хүсэлтээ өгсний дагуу түүнийг үүрэгт ажлаас нь чөлөөлөх, улмаар НИТХ–ын шинэ даргыг сонгох санал хураалт өнгөрсөн долоо хоногт НИТХ–ын төлөөлөгчдийн дунд явагдсан.

Тус хуралдаанаар НИТХ–ын даргад  Нийслэлийн МАН–ын бүлгээс Д.Баярсайхан төлөөлөгчийн нэрийг дэвшүүлсэн бол  заалнаас С.Амарсайхан төлөөлөгчийн нэр дэвшигдэж  санал хураалт явагдсанаар хуралдаанд оролцсон  НИТХ–ын 44 төлөөлөгчийн 17 нь  Д.Баярсайханд, 17 нь С.Амарсайханд тус тус санал өгч, 10 төлөөлөгч цагаан хуудас өгсөн буюу хоёр нэр дэвшигчийн алийг нь ч дэмжээгүй байдаг.

Тэгвэл өнгөрсөн даваа гарагт хаалттай  болсон МАН–ын бага хурлын үеэр НИТХ–ын төлөөлөгч, МАН–ын бага хурлын гишүүн Д.Баярсайхан хатагтай намынхандаа хандаж гоморхлын үг унагажээ. Тэрээр “Намайг НИТХ–ын даргад намын бодлогоор дэвшүүлсэн атал  заалнаас өөр нэр дэвшигч гарган  санал хуваалгаж, намын бодлогын эсрэг ажилласан  НИТХ дах МАН–ын төлөөлөгчдөд хариуцлага тооцох хэрэгтэй” гэх ухааны юм ярьжээ. Үүний дараа МАН–ын Бага хурлын гишүүдийн дунд манай намын бодлого Д.Баярсайханыг дэвшүүлэх хүртлээ ингэж доройтсон юм уу, яагаад  намын бодлого гэдгээр төлөөлөгчдийн үзэл бодлыг хайрцаглах ёстой гэж,  НИТХ–ын даргад заалнаас нэр дэвшүүлэх асуудлыг намын бодлогоор хаах гэж оролдлоо хэмээн Д.Баярсайхан төлөөлөгчийг шүүмжилсэн өнгө аястай санал шүүмжлэл, сэтгэгдлүүд олон гарсан байна. Үнэхээр ч намын бодлогоор Их хотын ИТХ-ыг тэргүүлэхээр нэрийг нь дэвшүүлсэн гэх Д.Баярсайханы мэдлэг боловсрол,  гадаад байдал, намдаа гоморхож байгаа хандлага  бага хурлын гишүүдэд таалагдсангүй бололтой.

Ямартай ч  НИТХ–ын даргад нэр дэвшээд байгаа хатагтай Д.Баярсайхан намын бодлогоор нэр дэвшээд байхад  намын төлөөлөгчид  намайг дэмжсэнгүй хэмээн битүүхэндээ гомдол бухимдал тээж яваа гэнэ.

Ц.Бат