Шивээс хорт хавдар үүсгэдэг

 Шивээс хийхэд ашиг­ладаг бодис нь хүний биед хортой болохыг Их Бри­танийн эрдэмтэд олж тогтоожээ.

Тус улсын Брэдфордын их сургуулийн судлаачдын тогтоосноор шивээсэнд ашигладаг бэхний хор нь хүний бие махбодод хуримт­лагдаж, яваандаа хавдрын өвчлөл үүсгэдэг байж болзошгүй гэнэ. Бэхний нано хэсгүүд цу­санд нэвтэрч, элэг, дэ­лүүнд хуримтлагдсаар бие махбодоос хортой бодис, хэрэггүй хог хаягдлаа гар­гах чадварыг нь эрс бууруулдаг байна.

Түүнчлэн туршилтын явцад зарим салоны хэрэг­лэдэг шивээсний бэх канцероген агуулдаг бо­­лох нь батлагджээ. Тий­мээс биедээ ямар нэгэн зураг зуруулахаасаа өм­нө бэх, будгаа сайтар сонгох хэрэгтэйг эрдэмтэд анхааруулж байна.

Судалгааг удирдсан эрдэмтэн Десмонд Тобин “Шивээсний бизнест бэх­ний сонголтын тухай ямар нэгэн дүрэм журам гэж байдаггүй. Гэтэл судал­гааны явцад улаан өнгийн бэх хар тугалга, но­гоон, хөх нь кобальт, хорт хавдар үүсгэгч метал­лууд агуулагддаг болох нь тогтоогдсон” гэжээ.

Тэгвэл Копенгагены их сургуулийн арьсны өвчин судлалын профес­сор Йорген Серапын явуул­­сан өөр нэгэн судал­гаагаар Европт шивээс хий­хэд ашигладаг 21 төр­­лийн бэхний 13-т нь канцероген бодис илэр­сэн байна. Тиймээс шивээсний салонууд үйлч­­­лүү­лэгч­дэдээ бэхний найрлагыг сайтар уншиж танил­цуулах хууль гаргах хэрэгтэй гэж судлаач тэмдэглэжээ.

Дашрамд дурдахад АНУ-ын судлаачид хоёр жилийн өмнө хар бэхнээс бензопирен хэмээх бодис илрүүлж, шуугиан тарьж байсан түүхтэй. Энэ бодисыг амьтан дээр туршиж үзэхэд арьсны хорт хавдар үүсгэж байсан аж.