Өглөө.мн Шинэ өглөө, Шинэ мэдээлэл
Монгол Улсын нийгэм, эдийн засгийн хөгжилд шинэ жишиг болж, олон улсын стандартыг ханган, улс орныхоо хөгжлийн илэрхийлэл, өрсөлдөх чадварын нэрийн хуудас болон үнэлэгдсэн дэд бүтэц, үйлдвэрлэл, хөдөө аж ахуй, газар тариалан, аялал жуучлал ба бизнесийн шинэ чиглэлийн онцгой бүтээн байгуулалтад Монгол Улсын Ерөнхийлөгчийн зарлигаар “Үндэсний бүтээн байгуулалтын дээд шагнал-Төрийн гэрэгэ” шагнал олгодог юм.
2018 оны “Үндэсний бүтээн байгуулалтын дээд шагнал-Төрийн гэрэгэ” шагнал хүртэх бүтээн байгуулалтаар:
Өмнөговь аймгийн төв Даланзадгад сумын Шинэ суурьшлын бүсийн бүтээн байгуулалт
МУИС-ийн номын сангийн бүтээн байгуулалт
“Эрэл” ХХК-ийн “Байшин үйлдвэрлэх комбинат-I” төслүүд шалгарч, Төрийн гэрэгэ шагнал хүртэхээр боллоо.
Шагналд нэр дэвшүүлэхэд Аймаг, нийслэлийн Иргэдийн Төлөөлөгчдийн хурал, Засаг даргын Тамгын газар нь өөрийн орон нутагт тухайн жилд бий болсон бүтээн байгуулалтыг, Төрийн яамд өөрийн салбарт тухайн жилд бий болсон бүтээн байгуулалтыг, Мэргэжлийн холбоо, төрийн бус байгууллагууд өөрийн дэмжиж буй бүтээн байгуулалтыг санал болгох эрхтэй байдаг бөгөөд эдгээр байгууллагууд 2018 оны дөрөвдүгээр сарын 1-ний өдрийн дотор саналаа Монгол Улсын Ерөнхийлөгчийн Тамгын газарт ирүүлсэн юм.
Ингээд тэдгээр санал, холбогдох бичиг баримтыг Ерөнхийлөгчийн Тамгын газрын даргын захирамжаар байгуулагдсан төрийн байгууллага, мэргэжлийн холбоо, шинжлэх ухааны байгууллага, эрдэмтэн судлаач, иргэд олон нийтийн төлөөллөөс бүрдсэн ажлын хэсэг нягтлан судалж, сонгон шалгаруулалт хийсэн байна. Шагналыг өнөөдөр Монгол Улсын Ерөнхийлөгч Х.Баттулга гардуулж өгнө.
