Өглөө.мн Шинэ өглөө, Шинэ мэдээлэл
НҮБ-ын гишүүн бүх улстай Монгол Улс дипломат харилцаа тогтоох зорилтын хүрээнд Эсватинийн хаант улстай энэ сарын 21-ний өдөр Нью-Йорк хотноо дипломат харилцаа тогтоов.
Хоёр улс найрсаг харилцаа, хамтын ажиллагааг хөгжүүлэн бэхжүүлэх хоёр талын эрмэлзлийг удирдлага болгож, Дипломат харилцааны тухай Венийн конвенц, НҮБ-ын Дүрэм, олон улсын эрх зүйн зарчим, хэм хэмжээг баримтлахаа тохиролцлоо.
Дипломат харилцаа тогтоох тухай Хамтарсан албан мэдээнд Монгол Улсаас НҮБ-ын дэргэд суугаа Онц бөгөөд Бүрэн эрхт Элчин сайд, Байнгын төлөөлөгч Сүхээгийн Сүхболд, Эсватинийн Хаант улсаас НҮБ-ын дэргэд суугаа Онц бөгөөд Бүрэн эрхт Элчин сайд, Байнгын төлөөлөгч Мелуси Мартин Масуку нар гарын үсэг зурав.
Дипломат харилцаа тогтоосноор хоёр талын болон олон улсын байгууллагуудын хүрээнд харилцан дэмжлэг үзүүлэх, хамтран ажиллах илүү боломж нээгдэж байгааг талууд илэрхийллээ.
Жич: Эсватини улс нь энэ оны дөрөвдүгээр сарыг хүртэл Свазилэнд нэртэй байсан юм. 1.3 сая хүн амтай Эсватини нь хаант засагтай, далайд гарцгүй, Өмнөд Африкийн БНУ, Мозамбик улсуудтай хиллэдэг.
Гадаад Харилцааны Яам
