“Уншлагыг дэмжих 2021” төслийн хүрээнд нийслэлд анх удаа хүүхдийн номын хамгийн том хямдралтай үзэсгэлэн худалдаа болох гэж байна.
Нийслэлийн бүх номын дэлгүүр, хэвлэлийн газрууд 12 сарын 1,2-ны бямба, ням гарагт нэгэн дор хамгийн өндөр хямдралтай номын худалдааг Соёлын төв өргөө болон Д.Нацагдоржийн нэрэмжит УБ хотын номын санд тус тус зохион байгуулна.
Энэ үеэр хүүхдийн номыг 20-70 хувийн хөнгөлөлттэй үнээр худалдаалах бөгөөд “Тагтаа” хэвлэлийн газар, “Сэлэнгэ” пресс, “Аз хур” ХХК, “Соёмбо” пресс, “Мир ном”, “Мон судар”, “Нүүдлийн зурган өгүүлэмж” ТББ-Бумбардай комикоор тус тус оролцох аж.
НИТХ-ын Тэргүүлэгчдийн хурлаар “Уншлагыг дэмжих-2021” төслийг батлан хэрэгжүүлж эхэлсэн бөгөөд тус хөтөлбөрийг НИТХ-ын Нийгмийн хөгжлийн хороо, Нийслэлийн Боловсролын газар, Нийслэлийн Соёл урлагийн газар, Нийслэлийн эрүүл мэндийн газар, JCI Mongolia ТББ, Д.Нацагдоржийн нэрэмжит Улаанбаатар хотын төв номын сантай хамтран хэрэгжүүлж байна.