“Агаарын бохирдлын эсрэг хүчээ нэгтгэе” хэлэлцүүлэг  болж байна

Нийслэлийн ИТХ-ын Байгаль орчин, ногоон хөгжлийн хороо, нийслэлийн Агаарын бохирдлыг бууруулах газар хамтран “Агаарын бохирдлын эсрэг хүчээ нэгтгэе” хэлэлцүүлэг зохион байгуулж байна. Хэлэлцүүлэгт Нийгмийн эрүүл мэндийн үндэсний хүрээлэн, ШУТИС-ийн эрдэмтэн, судлаачид, төрийн бус байгууллагын төлөөлөл оролцож байгаа юм.

Нийслэлийн агаар, хөрсний бохирдлын 80 хувь нь гэр хорооллоос, 10 хувь нь тээврийн  хэрэгслээс үүдэлтэй. Тиймээс эхний ээлжинд амины орон сууцны дулаан алдагдлыг бууруулах, цахилгаанаар халаах техникийн боломж бүрдүүлэх хэрэгтэй гэж хэлэлцүүлэгт оролцогчид хэллээ. Мөн Засгийн газраас баталсан 62 дугаар тогтоолыг ажлын явцыг эрчимжүүлж, сайжруулсан түлшний нийлүүлэлтийг нэмэгдүүлэх шаардлагатай ч онцолсон.

Нийслэлийн удирдлага агаарын бохирдлыг бууруулах хүрээнд халаалтын зуухуудыг үе шаттай буулгаж, сургууль, цэцэрлэгийг төвлөрсөн дулаанд холбох, гэр хороололд инженерийн дэд бүтэц татах арга хэмжээ авч буй. Мөн нийслэлийн ИТХ-ын дарга С.Амарсайхан үүрэг өгч, сайжруулсан түлшний нийлүүлэлтийг нэмэгдүүлэх чиглэл өгөөд буй. Энэ хүрээнд сонгогдсон найман хороонд сайжруулсан түлш нийлүүлж эхлээд байна.