Агаарын бохирдлын асуудлаар ерөнхий хяналтын сонсгол зохион байгуулна

 Монгол Улсын Их Хурлын Байгаль орчин, хүнс, хөдөө аж ахуйн байнгын хорооноос Агаарын бохирдлын ерөнхий хяналтын сонсголыг энэ сарын 30-ны өдөр зохион байгуулагдана. Энэ удаагийн ерөнхий хяналтын сонсголд иргэдийг оролцуулахаар болжээ.

Иймээс ерөнхий хяналтын сонсголд оролцож үзэл бодлоо илэрхийлэх хүсэлтэй иргэд 1-р сарын 23-ны 17.30 цагаас өмнө овог, нэр, оршин суугаа газрын буюу шуудангийн хаяг, гарын үсэг, холбогдох утасны дугаараа  бичсэн хүсэлтээ  бичгээр болон цахим шууданд захидал илгээн бүртгүүлэх юм байна.

Оролцогч санал, тайлбар, мэдээлэл хийх бол мэдээллийг 2019 оны 01 дүгээр сарын 28-ны өдрийн дотор бичгээр ирүүлсэн байна.

Шуудангийн хаяг: 14201 Улаанбаатар хот, Сүхбаатар дүүрэг, Жанжин Д.Сүхбаатарын талбай 1, Төрийн ордон-401, Байгаль орчин, хүнс, хөдөө аж ахуйн байнгын хороо. /Лавлах утас: 51-261240/

    Цахим шуудангийн хаяг: sonsgol@parliament.mn

    Жич: Монгол Улсын Төрийн ордны хамгаалалт, үйлчилгээний журамд заасны дагуу оролцох хүмүүсийн иргэний үнэмлэхийг үндэслэн албаны болон үндэсний хувцастай Төрийн ордонд нэвтрүүлнэ.

Ерөнхий хяналтын сонсгол нь агаарын бохирдлыг бууруулах чиглэлийн бодлого шийдвэр, хууль тогтоомжийг хэрэгжүүлэх чиг үүрэг бүхий байгууллага, албан тушаалтны үйл ажиллагаанд хяналт тавих, хэрэгжүүлсэн арга хэмжээ, түүнд төсөвлөгдсөн хөрөнгийн зарцуулалт, үр дүнг тодруулах зорилготой юм.