Н. Алтанхуяг: АТГ-т С.Эрдэнийг шалгуулах гомдол гаргалаа

Ерөнхий сайд асан Н.Алтанхуяг АТГ-т хандаж байгаа талаараа мэдээлэл хийлээ. Тэрбээр “Би Капитал банканд байршиж байсан манай иргэдийн 240 гаруй тэрбум төгрөг эрсдэлд орчихоод байна. Үүний эзнийг олоход  анхаараач, мөн энэ асуудалд УИХ-ын гишүүн С.Эрдэнийг шалгаж өгөөч гэж АТГ-т гомдол гаргаж байна. Энэ гомдлыг гаргах болсон гурван шалтгаан бий.

Нэгдүгээрт, УИХ-ын гишүүн Н.Номтойбаяр тэтгэвэр, халамжийн мөнгийг янз бүрийн банканд байршуулахад эрсдэл үүсэж байна гэж 2-3 жил ярьсан. Гэвч ажил хэрэг болоогүй.

Энэ бүхнийг хараад энэ асуудал дээр эд нар огт ажиллахгүй юм байнаа гээд АТГ-т хандаж байгаа юм. Манай улстөрчид энэ асуудлыг хав дарж байгаад намар, юм уу өвөл гаргаж тавиад 2020 оны сонгууль дөхүүлж баахан шоу хийгээд, хоорондоо тохиролцох ийм л заваан юм болох гээд байна. Тиймээс АТГ энэ асуудлыг шийдэж 240 гаруй тэрбум төгрөгийг олж өгөх болов уу гэсэн горьдлого тээж байна.

Хоёрдугаарт, С.Эрдэнэ улаан цайм худал ярьж байна. Банканд мөнгө байршуулж байгаа асуудал надтай ямар ч хамаагүй гэсэн. Гэтэл С.Эрдэнэ  сайд болсныхоо дараа Нийгмийн даатгалын үндэсний зөвлөл гэдэг байгууллагыг толгойлдог болсон. Тэр байгууллага нь иргэдийн тэтгэвэр, эрүүл мэндийн даатгалын мөнгйг арилжааны банканд байршуулдаг журам баталсан. С.Эрдэнийн гарын үсэгтэй. Тэр журамд аль банканд байршуулахыг заавал С.Эрдэнээс асууж зөвшөөрөл авна гээд заачихсан. Өөрөө хийсэн үйлдлээ надад хамаагүй гэж байгаа нь их муухай юм. Тиймээс бичиг цаасыг нь нягтлаад үнэн мөнийг нь тогтоох хэрэгтэй.

Гуравдугаарт, хуулийн байгууллагын шинэ удирдлагуудыг би танихгүй. Ямар ч байсан Ц.Элбэгдорж, М.Энхболдын тавиулууд өөрчлөгдсөнд баяртай байгаа. Үнэнч, шударга ажиллах хүмүүс тавигдсан юм болов уу гэж найдаж байгаа. Ард түмний төлөө, шударга үнэний төлөө ажилладаг хүмүүс тавигдсан үгүйг мэдмээр байна.

240 тэрбум гэдэг бол маш их мөнгө. Арилжааны банканд байршуулах бол боломжтой банканд байршуулах ёстой байсан. Гэтэл чадал муутай, хэзээ ч дампуурч мэдэх банканд тэтгэвэр, эрүүл мэндийн даатгалын мөнгийг байршуулж, иргэдийн мөнгийг гарзанд гаргаад, тухайн банкийг аврах оролдлого хийсэн. Энэ бол зохион байгуулалттай гэмт хэргийн шинжтэй үйлдэл. Тиймээс энэ асуудалд холбогдслн, бараг зохион байгуулсан байж болох С.Эрдэнийн талаар АТГ-т гомдол гаргаж байгаа юм” гэлээ.