Өглөө.мн Шинэ өглөө, Шинэ мэдээлэл
Монгол Улсын Ерөнхий сайд У.Хүрэлсүх болон Засгийн газрын гишүүд өнөөдөр мэдээлэл хийлээ.
УИХ-аас “Ковид-19” цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хууль батлагдаж, өнөөдрөөс үйлчилж эхэллээ.
Үүнтэй холбоотойгоор Засгийн газар ээлжит хуралдаанаа хийж, “Ковид-19” цар тахлын энэ үед хүүхэд, хөгжлийн бэрхшээлтэй иргэн, нийгмийн эзмэг бүлгийн иргэдэд санхүүгийн дэмжлэг үзүүлэх тухай Засгийн газраас хэрэгжүүлэх хоёр дахь багц арга хэмжээний талаар хэлэлцэж, тогтоол баталжээ. Цар тахлын үед төсвийн зохицуулалт хийх зарим арга хэмжээний тухай тогтоол, Эдийн засгийг сэргээх, эмзэг бүлгийн иргэдийн нийгмийн халамжийг сайжруулах хоёрдугаар багц арга хэмжээний тухай хоёр тогтоолыг ийнхүү албан ёсоор гаргаж байгаагаа Монгол Улсын Ерөнхий сайд У.Хүрэлсүх хэллээ.
Ерөнхий сайд У. Хүрэлсүх“УИХ-аас Цар тахлын эсрэг хуулийг баталсан. Өнөөдрөөс хууль албан ёсоор үйлчилж эхэллээ. Энэ хүрээнд өнөөдөр Засгийн газар ээлжит хуралдаанаа хийлээ. Засгийн газрын хуралдаанаар хоёр тогтоолын төслийг баталлаа. Иргэдийн амьдралыг тэтгэх үүднээс дөрвөн арга хэмжээ авч байна. Тухайлбал, энэ сараас эхлэн аравдугаар сар хүртэлх зургаан сарын хугацаанд 0-18 насны хүүхэд сар бүр авдаг хүүхдийн мөнгөн тэтгэмжийг 100 мянган төгрөг болгох шийдвэрийг гаргалаа. Энэ сард 30 мянган төгрөг олгосон. Харин үлдсэн 70 мянган төгрөгийг удахгүй дансанд нь байршуулах болно” гэж мэдэгдлээ.
Энэхүү багц арга хэмжээнд дараах дөрвөн асуудлыг тусгасан байна.
- 0-18 насны хүүхэд бүрт сар тутам олгодог 30 мянган төгрөгийг 100 мянган төгрөг болгон нэмэгдүүлж, 4 дүгээр сарын 1-нээс 10 дугаар сарын 1-ний өдрийг хүртэл хугацаанд олгоно. Ингэхдээ 4 дүгээр сарын хүүхдийн мөнгө болох үлдэгдэл 70 мянган төгрөгийг нөхөж олгох юм.
- Нийгмийн халамжийн дэмжлэг, туслалцаа зайлшгүй шаардлагатай, бага орлоготой 122 мянган иргэн сар бүр 16 мянган төгрөг авдгийг 32 мянган төгрөг, 118 мянган хүүхэд сар бүр 8 мянган төгрөг авдгийг 16 мянган төгрөг болгон хоёр дахин нэмэгдүүлнэ. Үүнийг 5 дугаар сарын 1-нээс 10 дугаар сарын 1-ний өдрийг хүртэл хугацаанд олгоно.
- Нийгмийн халамжийн сангаас тэтгэвэр авдаг 3600 иргэн сар бүр 188 мянган төгрөг авдгийг 100 мянган төгрөг болгон нэмэгдүүлнэ. Тодруулбал, хөгжлийн бэрхшээлтэй 42500 орчим иргэн, одой 116 иргэн, тэжээгчээ алдсан 16500 орчим иргэн, өрх толгойлсон эцэг, эх сар бүр 188 мянган төгрөгийн тэтгэмж авдгийг 100 мянган төгрөгөөр нэмэгдүүлж, 288 мянган төгрөг болгоно. Үүнийг 5 дугаар сарын 1-нээс 10 дугаар сарын 1-ний өдрийг хүртэл хугацаанд олгох юм.
- Малчин өрхүүдэд ноолуурын урамшуулал болгож кг тутамд 20 мянган төгрөг нэмж олгоно.
Коронавирустай тэмцэх, эдийн засгийг эрчимжүүлэх хоёр дахь багц арга хэмжээг ийнхүү авч хэрэгжүүлж эхэллээ. Эдгээр дөрвөн арга хэмжээнд 793 тэрбум төгрөг зарцуулах бөгөөд төсвийн эх үүсвэрийг хөрөнгө оруулалт, урсгал зардлын болон цар тахлын үеийн хөл хөдөлгөөн хумигдсантай холбогдох хэмнэлтээс гаргаж байгаа болохыг Сангийн сайд Ч.Хүрэлбаатар хэллээ.
