Өглөө.мн Шинэ өглөө, Шинэ мэдээлэл
Боловсрол, шинжлэх ухааны яамны Сургуулийн өмнөх боловсролын газрын дарга Ж.Мягмар өнөөдөр /2020.09.02/ Эрүүл мэндийн яамны мэдээллийн цагт оролцож мэдээлэл өглөө.
Тэрээр “Сургуулийн өмнөх боловсролын байгууллагууд өндөржүүлсэн бэлэн байдлын дэглэмийн үед анх удаагаа сургалтын үйл ажиллагаагаа эхлүүлж улсын хэмжээнд 1475 цэцэрлэгт 199 мянган хүүхэд цэцэрлэгтээ явж эхэллээ.
Монгол Улсын Засгийн газар, Улсын онцгой комиссоос гаргасан шийдвэрийн дагуу Боловсрол, шинжлэх ухааны сайдын тушаал гарч сар гаруйн өмнөөс бэлэн байдлыг хангаж ажилласан. Мэргэжлийн байгууллагуудаас гаргасан зөвлөмжийн дагуу ариутгал халдваргүйтгэл бүрэн хийгдэж, багш нар эрүүл мэндийн үзлэг шинжилгээнд хамрагдсан.
Эцэг эхчүүд хүүхдээ цэцэрлэгт хүргэж өгөхдөө амны хаалт зүүлгэх, гэрт байх хугацаанд нь шим тэжээлтэй хоол хүнс өгөх, эрт унтуулах зэргээр дархлааг нь дэмжиж бүхий л арга хэмжээг авч анхаарал халамжаа сулруулахгүй байх хэрэгтэй.
Цэцэрлэг, багш эцэг эх аль аль нь хариуцлагатай, үүргээ сайн биелүүлснээр сургуулийн өмнөх боловсролын байгууллагын тасралтгүй үйл ажиллагаагаа явуулах нөхцөлийг хангаад зогсохгүй, хүйтэн сэрүүний улиралд хүүхдээ ханиад томуу, халдварт өвчний эрсдэлээс хамгаалах болно”гэдгийг санууллаа.
