Өглөө.мн Шинэ өглөө, Шинэ мэдээлэл
Монгол Улсын Засгийн газрын тохируулагч агентлаг Харилцаа холбоо, мэдээллийн технологийн газраас үндэсний цахим үйлчилгээний нэгдсэн систем /www.e-mongolia.mn/-ийг танилцуулж, веб портал болон гар утасны аппликейшн нэвтрүүлээд удаагүй байна.
Үүнтэй холбогдуулан Улсын бүртгэлийн ерөнхий газрын дарга Д.Дэлгэрсайхан өчигдөр /2020.10.21/ Е-Мongolia нэгдсэн системд тус газраас үзүүлж буй 26 төрлийн лавлагаа, үйлчилгээний талаар мэдээлэл хийлээ.
Тэрбээр“Өмнөх Засгийн газрын үед хэрэгжүүлж эхэлсэн “Нэг иргэн- Нэг бүртгэл” үндэсний хөтөлбөр энэ удаагийн цахим Монгол хөтөлбөртэй нэг зарчимтай, нэг зорилготой, нягт уялдаж байгаа юм. Монгол Улсын үндэсний ой санамжийн суурь нь Улсын бүртгэлийн мэдээллийн сан юм. Энэ суурь мэдээллийн санд үндэслээд бусад мэдээллийн сан үүснэ. Үндсэндээ энэ зарчмыг E-Mongolia систем бий болгож байна. Өөрөөр хэлбэл, төрийн үйлчилгээг олон газар бус нэг дор төвлөрүүлснээр цаг хугацаа, мөнгө хэмнэхээс гадна төрийн үйлчилгээний шат дамжлага, чирэгдэл, хүнд суртал эрс буурна” гэдгийг онцолж байв.
E-Mongolia өнөөдөр
Үндэсний цахим үйлчилгээний www.e-mongolia.mn нэгдсэн системийг 2020 оны 10 дугаар сарын 02-ны өдөр танилцуулсан. Төрийн үйлчилгээнээс хамгийн эрэлттэй байгаа нь Төрсний бүртгэлийн лавлагаа, Иргэний үнэмлэхийн лавлагаа, Хуулийн этгээдийн улсын бүртгэлд бүртгэлтэй эсэх лавлагаа, Гэрлэсний бүртгэлийн лавлагаа, Оршин суугаа хаягийн лавлагаа, Регистрийн дугаарын тухай лавлагаа, мөн Хуулийн этгээдийн нэр өөрчлөгдсөн тухай лавлагаа байна.
Уг системийг вэб портал болон гар утасны аппликэйшн гэсэн хоёр хувилбараар нэвтрүүлсэн бөгөөд өнөөдрийн байдлаар E-Mongolia аппликейшнийг 50 мянга гаруй иргэн гар утсандаа суулгаж, 41 мянга гаруй үйлчилгээг цахимаар аваад байна. Тухайлбал, 252 иргэний үнэмлэх, 2,881 жолооны үнэмлэхийг тус порталаар захиалжээ. Давхардсан тоогоор 152,175 иргэн уг систем рүү нэвтэрч, долоо хоногт дунджаар 10,600 иргэн үйлчилгээ аваад байна.
