Өглөө.мн Шинэ өглөө, Шинэ мэдээлэл
Токио-2020 зуны 32 дахь олимпын эмэгтэйчүүдийн -48 кг жинд жүдо бөхийн төрөлд амжилттай оролцож анхны хүрэл медалийг хүртсэн Монгол Улсын гавьяат тамирчин, Цагдаагийн ерөнхий газрын “Хүч” спорт хорооны ахлах дасгалжуулагч, цагдаагийн хошууч Мөнхбатын Уранцэцэг өчигдөр орой /2021.08.04/эх орондоо хүрэлцэн ирлээ.
МУГТ М.Уранцэцэгийг “Чингис хаан” олон улсын нисэх буудалд газардсаны дараагаар түүнтэй цөөн хором ярилцлаа.
–Монгол Улсын төрийн далбаагаа Токиогийн олимпын тэнгэрт мандуулж хүрэл медаль хүртсэнд тань баяр хүргэе. Монголын ард түмэн танаар маш их бахархаж байна. Сэтгэгдлээ хуваалцана уу?
-Маш их баярлалаа. Сэтгэгдэл маш өндөр байна. Шөвгийн дөрөвт шалгараад Португалын Катарина Костатай барилдаж, өчих мэхээр ялж хүрэл медалийн болзол хангасан. Миний хувьд энэ спортоор хичээллэж эхэлснээсээ хойш өөртөө том зорилго тавьсан, зорилгодоо хүрч гурав дахь олимпоосоо хүрэл медаль хүртсэндээ үнэхээр их баяртай байна.
–Монголын цагдаагийн түүхт 100 жилийн ойдоо маш том бэлэг барихаар хичээх болно гэж олимпд оролцох эрх авчхаад та хэлж байсан.
-Тэгэлгүй яах вэ. Саяхан л олимпд оролцох гээд догдолж бас багагүй сандарч байсан үе минь ард үлдсэн байна. Мөр зэрэгцэн ажиллаж буй алба хаагчид маань үргэлж ойлгож тусалж дэмждэг учраас илүү их хичээх ёстой гэдгээ цаг тутамд мэдэрдэг. Тиймээс Токио-2020 зуны олимпдоо амжилттай оролцож 100 жилийн түүхтэй цагдаагийн албандаа бэлэг барьж чадсандаа туйлын их баяртай байна.
-Монголын цагдаагийн түүхт 100 жилийн ойн босгон дээр цагдаагийн хошууч цолоор шагнагдсан байсан. Дахин баяр хүргэе.
-Баярлалаа. Зуны олимпын наадамд оролцохын өмнө Цагдаагийн ерөнхий газрын даргын тушаалаар “Цагдаагийн хошууч” цолоор шагнагдсан. Монгол төрийн цагдаагийн албанд ажиллаж, өөрийн хүч хөдөлмөрөө үнэлүүлж нэр төртэй, цагдаагийн хошууч хэмээх хүндтэй цолоор шагнагдсандаа туйлын их баяртай байгаа. Цаашдаа илүү их хичээн ажиллах болно.
-Энэ амжилтад тань хүрэхэд тусалж, дэмжсэн хүмүүстээ хандаж хэлэх үг?
Тэгэлгүй яахав. Аливаа амжилтын цаана яах аргагүй бат зогсдог дэмждэг хүмүүс үргэлж байдаг. Өдийг хүртэл намайг үргэлж дэмжиж, хайрлаж, хурцалж ирсэн гэр бүл, найз нөхөд, ард түмэн, мөр зэрэгцэн ажиллаж буй алба хаагчид, Цагдаагийн ерөнхий газрын “Хүч” спорт хороо, дасгалжуулагчид, ивээн тэтгэгч нартаа маш их баярласан талархсанаа илэрхийлмээр байна. Цаашдаа илүү их хичээх болно.
-Мөр зэрэгцэн ажиллаж буй алба хаагч нартаа мэндчилгээ дэвшүүлнэ үү?
-100 жилийн аугаа түүхтэй Монголын Цагдаа гэх их айл, гэр бүлийн нэгэн гишүүн нь болж түүхийг нь бүтээлцэж яваа энэ он жилүүдийг хэзээ ч мартагдашгүй. Ард иргэдийнхээ аюулгүй байдал, энх амгаланг сахиулах үйлсэд мэдлэг ур чадвар, бие сэтгэлээ зориулсан үе үеийн ахмадууд, алба хаагч, ажилтнууд болон тэдний гэр бүлд нь Цагдаагийн байгууллага үүсэж хөгжсөний түүхт 100 жилийн ойн баярын мэндийг хүргэе. Монголын цагдаагийн сүр хүч, сүлд хийморь нь цагаан шонхор шигээ өөдөө өнө мөнх мандан бадрах болтугай.
Ярилцсанд баярлалаа.
