Б.Жавхлан: Засгийн газар “Гэрэгэ” бондын өрийг бүрэн төлж барагдууллаа

Засгийн газар “ГЭРЭГЭ” бондын төлбөрийг бүрэн төлж барагдуулсан талаар Сангийн сайд Б.Жавхлан өнөөдөр /2023.05.01/мэдээлэл хийлээ.

---

Сангийн сайд Б.Жавхлан “Монгол улсын Засгийн газар 2017 онд авсан 800 сая долларын “Гэрэгэ” бондын өрийн үлдэгдэл болох 368,7 сая долларыг бүрэн төлж барагдууллаа.

Л.Оюун-Эрдэнийн Засгийн газар сүүлийн 3 жилийн хугацаанд 1,6 тэрбум ам.долларын  өрийн зохицуулалтыг амжилттай хийснээр, өрийн дефолтын эрсдэлээс сэргийлж чадлаа.

Засгийн Газар 2016 онд авсан “Кредит свисс” банкны 60 сая ам.долларын синдикат зээлийг 2021 оны 3-р сард бүрэн төлсөн бол 2016 онд гарсан “Мазаалай” бондын үлдэгдэл,132,6 сая ам.долларыг 2021 оны 4-р сард бүрэн барагдууллаа.

Мөн 2012 онд босгосон “Чингис” бондын өрийн 136,8 ам.долларыг 2022 оны 12-р сард хугацаанд төлж барагдуулаад байна. Өнөөдөр “Гэрэгэ” бондын үлдэгдэл 368,7 сая ам.долларын өрийг бүрэн төлж барагдууллаа.

Засгийн газар сүүлийн 3 жилийн хугацаанд 1,6 тэрбум ам.долларын өрийн зохицуулалтыг амжилттай хийж, “МАЗААЛАЙ” “ЧИНГИС” “ГЭРЭГЭ” бондуудын өр төлбөрийг бүрэн барагдууллаа.

Ингэснээр Монгол улс дефолтын эрсдэлээс бүрэн гараад байна.” гэж мэдэгдэв.

---

Цар тахал, ОХУ Украины дайнаас шалтгаалсан эдийн засгийн хүнд үед Монгол улс бондын өр төлбөрийг тогтмол барагдуулж, дефолт болох эрсдэлээс хамгаалж, зээлжих зэрэглэлээ тогтвортой хэвээр хадгалж чадлаа.

2023 оны 12-р сарын 25-нд төлөгдөх “Самурай” бондын 30 тэрбум иенийн эх үүсвэрийг хадгалсан байна.

Харин 9-р сард төлөгдөх ёстой “Евро” бондын 500 сая долларын өр дараах эх үүсвэрийг бэлдэхээр зорьж байна.

 Ингэхдээ “Хөгжлийн банк”-ны чанаргүй зээлийн эргэн төлөлт болон бусад эх үүсвэрүүдийг цуглуулж, “Евро” бондын өрийг төлнө.