Өглөө.мн Шинэ өглөө, Шинэ мэдээлэл
Гурван ч аймаг нэг зэрэг 100 жилийн ойгоо сүр дуулиантай тэмдэглэлээ. Эндээс Хэнтийн 100 жилийн ойн баяр наадмын их насны морины уралдаан хэл ам, хэрүүл тэмцэлтэй болов. “…Хөвсгөлийн уяач Б.Отгонсэлэнгийн хээр морь түрүүлсэн ч хасагдчихлаа” гээд наадмынх нь хэдэн өдөр яригдлаа. Үүнтэй холбоотойгоор тус баяр наадмын хурдан морины комиссоос мэдэгдэл хүртэл гаргав.
Тэр мэдэгдэлд нь “…Хэнтий аймгийн 100 жилийн ойн баяр наадмын үеэр их насны морины уралдаанд нийт 148 морь бүртгүүлсэн. Үүнээс сэрвээний өндрөөр 20 морь хасагдсан. Эдгээр морьдын дунд 19 дугаартай Хөвсгөл аймгийн уяач Б.Отгонсэлэнгийн хээр морь 145 см өндөртэй тул сэрвээний хэмжилтээр хасагдаж, бусад морьдын хамт хашсан байсныг хүч түрэн гаргаж уралдуулсан байна.
Иймд тухайн үйл явдалтай холбоотой баримт, материалууд болон хасагдсан морийг уралдаанд оруулсан, энэ явдалд гар бие оролцсон бүх хүнийг хууль хяналтын байгууллагад шалгуулж байна. Хэмжилтээрээ хасагдсан морь түрүүлсэн тул Морины комиссын шийдвэрээр хасаж, дараагийн морийг түрүүлснээр тооцон цоллосон болно” гэжээ. Эндээс харвал, энэ наадмын хэрүүл хууль хяналтын байгууллагаар шийдэгдэхээр болж байна. Юу болсныг эрж сурах нээ, Хэнтийн наадмын Морины комиссынхон энэ мэдэгдэлдээ нэг зүйлийг “бүрхэгдүүлж” орхисон байх юм.
Мэдэгдэлд “…Хээр морь 145 см-тэй тул сэрвээний хэмжилтэн дээр хасагдаж, бусад морьдын хамт хашсан байсныг хүч түрэн гаргаж уралдуулсан” гэсэн. Үнэхээр ч Хөвсгөлийн Б.Отгонсэлэнгийн хээр морь дүрэмд зааснаар сэрвээний хэмжилтээр хасагдаад байжээ. Ингээд хашаатай байхад нь Хэнтий аймгийн Цагдаагийн газрын дарга, цагдаагийн хурандаа Д.Батхүү “хүч түрэн”, гаргах зөвшөөрөл өгснөөр энэ будилаан үүссэн байгаа юм.
Өөрөөр хэлбэл, Хэнтийн Цагдаагийн дарга Д.Батхүү Хөвсгөлийн хээр морийг хашаанаас гаргаж, аймгийнхаа 100 жилийн ойн наадмаа будилуулсан болж таарчээ.
Б.ДАМДИН-ОЧИР
Эх сурвалж: “Зууны мэдээ” сонин
