ЦЕГ:Угаарын хийнд хордохоос урьдчилан сэргийлэхийг анхааруулж байна

Цагдаагийн байгууллагад энэ оны 01 дүгээр сарын 04-ний өдрийн 05 цагийн орчимд “Баянзүрх дүүргийн 3 дугаар хороо Дарь-Эхэд байрлах гэртээ 7 хүн угаартсан байна” гэх мэдээлэл ирүүлснийг шалгахад 19-44 насны 5 хүн, 1 настай, 8 настай эмэгтэй хүүхдүүд урьдчилсан байдлаар угаартсан байсныг тогтоон, шалгалтын ажиллагааг үргэлжлүүлж байна.

Мөн өдрийн 06 цагийн үед “Баянзүрх дүүргийн 9 дүгээр хороо Шар хадны дугаар тоотод байрлах гэртээ угаартсан” гэх мэдээлэл ирүүлснийг шалгахад 20-28 насны 3 хүн, 4 настай эмэгтэй хүүхэд угаартсан байсныг тогтоон, шалгалтын ажиллагааг хийж байна.

Одоогоор хохирогчдын биеийн байдал хэвийн, эмнэлгийн байгууллагад эмчилгээ хийгдсэн байна. Иймд иргэд та бүхэн гэр, байшин, орон сууцандаа агаарын сэлгэлтийг тогтмол хийх, яндангаа хөөлөх, бүрэн шаталт дуустал яндангийн хаалтыг хаахгүй байх, пийшин зуухны онгорхой, цоорхой цууралтыг шалгаж бөглөх, угаарын хийн мэдрэгч суурилуулах, уг төхөөрөмжийн хэвийн ажиллагааг тогтмол шалгах, дохиоллыг салгаж унтраахгүй байх зэргээр угаарын хийнд хордохоос урьдчилан сэргийлэхийг анхааруулж байна.