НИТХ-ын дарга Д.Ихбаяр: Нийслэлийн өмнө тулгамдсан асуудлуудад шуурхай, хариуцлагатай ажиллахыг үүрэг болгож байна

Нийслэлийн ИТХ-ын Ээлжит VIII хуралдааныг хааж, Нийслэлийн ИТХ-ын дарга Д.Ихбаярын хэлсэн үгийг хүргэж байна.

Нийслэлийн ИТХ-ын ээлжит VIII хуралдаанаар хэлэлцэхээр төлөвлөсөн асуудлаа амжилттай хэлэлцэж дууслаа.

    Түлшний хомсдолгүй өвөлжих нөхцөл боломжоор хангах зохицуулалтыг оновчтой хийх шаардлагатай

Өнөөдрийн хуралдаанаар Монгол Улсын Засгийн газрын 2018 оны 62 дугаар тогтоолын хэрэгжилт, 2026-2027 оны халаалтын улиралд авч хэрэгжүүлэх ажлын мэдээллийг сонслоо.

Агаарын бохирдлыг бууруулах чиглэлээр Хагас коксжсон нүүрсний худалдан авалтад тавих хяналтыг тогтмол хийх, шахмал түлшний нөөцлөлт, түлш тээвэрлэлт, борлуулалтын үйл ажиллагааг тасалдалгүй харилцан уялдаатай зохион байгуулахад онцгой анхаарч, иргэд айл өрхийг чирэгдэлгүй, түлшний хомсдолгүй өвөлжих нөхцөл боломжийг сайтар хангах чиглэлээр зохицуулалтыг тухай бүр оновчтой хийх шаардлагатай. Мөн шингэрүүлсэн нефтийн хийн халаалтад шилжсэн айл өрхийн хийн зуухны ашиглалтад тавих хяналтыг сайжруулж, аливаа эрсдэл гарахаас урьдчилан сэргийлэх, иргэдэд өгөх зааварчилгааг цаг тухай бүрд нь хийх, өвөлжилтийн бэлтгэл ажлыг төлөвлөгөөний дагуу тооцоо судалгаатай, системтэй, зохион байгуулалттайгаар эрчимжүүлж ажиллахыг чиглэл болгож байна.

    Бодлого шийдвэр гарах болсон шалтгаан нөхцөл, ач холбогдлын талаарх мэдээллийг дутуу дулимаг өгч болохгүй

Мөн Засгийн газраас хэрэгжүүлж буй “Чөлөөлье” аяны хүрээнд хэд хэдэн зарчмын асуудал хэлэлцэн, иргэдийн эрх ашгийг эрхэмлэн шийдвэрлэлээ.

Төр, захиргааны байгууллагуудаас гарч байгаа бодлого, шийдвэрийг хэрэгжүүлэхдээ, иргэддээ бид зөв ойлгуулах, бодлого шийдвэр гарах болсон шалтгаан нөхцөл, ач холбогдлын талаарх мэдээллийг дутуу дулимаг өгч болохгүй. Үүнээс үүдэж цаг үеийн чухал шаардлагатай ажлуудын хэрэгжилт удаашрах, иргэдийн бухимдал үүсэх, ажил цалгардах зэрэг шалтгаан нөхцөл бий болж байна.

Найр наадам, аялал зугаалгын улирал дуусч, өвлийн улирал хаалга тогшиж байгаа энэ үед өвөлжилтийн бэлтгэл ажил, ус, дулаан хангамж, инженерийн байгууламж, иргэдийн ая тухтай ажиллах, амьдрах нөхцөлийг бүрдүүлэх чиглэлээр онцгой анхаарч, холбогдох байгууллагууд хугацаат ажлаа хуваарийн дагуу гүйцэтгэхдээ нарийн хяналт тавьж, хэрэгжүүлж ажиллахыг уриалж байна.

    КОП17-г зохион байгуулагч орон болсноор дэлхий нийтийн анхаарлыг энэ асуудалд хандуулах, бодлогыг зангидах     чухал үүрэг хүлээж байна

Удахгүй есдүгээр сарын 1 болж, 2026-2027 оны хичээлийн жил эхлэх гэж байна.  Үүнтэй холбогдуулан төрийн өмчийн болон хувийн хэвшлийн бүх шатны сургууль, цэцэрлэгүүдийн хичээлийн жилийн бэлтгэл ажлын гүйцэтгэл, бэлэн байдлыг газар дээр нь танилцаж, үнэлэлт дүгнэлт өгч ажиллахыг Нийслэлийн Боловсролын газар, бүх шатны Засаг дарга нар, нийт сургууль, цэцэрлэгийн удирдлагууд, холбогдох бусад байгууллагуудад чиглэл болгож байна.

Монгол Улсын нийслэл Улаанбаатар хотод Цөлжилттэй тэмцэх НҮБ-ын конвенц (UNCCD)-ийн нэрийн дор, НҮБ-ын стандартаар, хоёр жил тутамд зохион байгуулагддаг дэлхийн хэмжээний арга хэмжээ энэ наймдугаар сарын 17-ноос 28-ны өдөр зохион байгуулагдах гэж байна.

Монгол орны уур амьсгал, хуурай бүсийн онцлог нь цөлжилтөд нэн эмзэг эко системтэй нягт холбоотой тул энэхүү сорилтыг даван туулах чиглэлээр дэлхий нийттэй туршлага хуваалцах, хамтран шийдэл боловсруулах өргөн боломж бүрдэж байна.

Бид КОП17-г зохион байгуулагч орон болж, олон орны төлөөлөл, зочдыг хүлээн авснаар дараагийн хурал хүртэл дэлхий нийтийн анхаарлыг энэ асуудалд хандуулах, бодлогыг зангидах чухал үүрэг хүлээж байна. Энэ арга хэмжээнд нийслэлийнхэн бид онцгой үүрэг, хувь нэмэртэй оролцож байгаа учраас бүх шатанд хариуцлагатай хандахыг мөн уриалж байна.

    Суррон, скүүтер, мопедын хөдөлгөөнд хяналт шалгалтыг зохион байгуулж, иргэдийн эрх ашгийг хамгаалахад онцгой анхаарч ажиллахыг холбогдох байгууллагуудад чиглэл болгож байна

Нийслэлийн иргэдийн эрүүл, аюулгүй орчинд амьдрах эрхийг хангах, гэмт хэрэг, хэв журмын зөрчил, үер усны аюул, болзошгүй осол эндэгдлээс урьдчилан сэргийлэх, нийтийн эзэмшлийн зам талбайн орчны аюулгүй байдлыг хангах чиглэлд онцгой анхаарч, нийслэлийн замын түгжрэл, авто замын хөдөлгөөний ачааллыг бууруулах чиглэлээр байгууллагууд ажлаа эрчимжүүлж, замын бүтээн байгуулалтын ажлыг даруй шуурхайлан, иргэдийг бухимдалгүй, замын хөдөлгөөнд оролцоход анхаарч, замын хөдөлгөөний ачааллыг бууруулах чиглэлээр авч буй арга хэмжээ, төлөвлөж буй ажлуудаа иргэдэд сайн сурталчлан таниулж байхад анхаарах шаардлагатай байна.

Сүүлийн үед 2 дугуйт тээврийн хэрэгслийн хэрэглээ нэмэгдсэнээс үүдэн өсвөр насны хүүхэд, залуучууд цахилгаан хөдөлгүүрт унадаг дугуй, мопед, түүний төрөлд хамаарах скүүтер, тэдгээртэй адилтгах үзүүлэлт бүхий тээврийн хэрэгсэл, мотоцикль унаж, замын хөдөлгөөнд оролцох явдал эрс нэмэгдэж, зам тээврийн осолд өртөж, өөрт болон бусдад эрүүл мэнд, эд материалын хохирол учруулах, бусдын хэвийн аюулгүй зорчих эрхэд нөлөөлөх, стресс бухимдалд оруулах нөхцөл байдал ихээр гарч байна. Нийслэлийн хэмжээнд суррон, скүүтер, мопедоос үүдэлтэй осол гэмтлийн тохиолдол 2024 онд 446 гэж бүртгэгдэж байсан бол 2025 онд 2792 болж 6 дахин, 2026 оны эхний 7 сарын байдлаар 1327  болж нэмэгдэж, улмаар хүний амь нас эрсэдсэн эмгэнэлт үйл явдал гарлаа. Эрдэнэт хүний амь нас эрсэдсэн явдалд НИТХ-ын зүгээс эмгэнэл илэрхийлж байна.

Цаашид Монгол Улсын Замын хөдөлгөөний аюулгүй байдлын тухай хуулийн нэмэлт, өөрчлөлтийг хэрэгжүүлэх хүрээнд нийслэлийн зүгээс  гаргаж байгаа бодлого, шийдвэрийг хэрэгжүүлэх, тухайн тээврийн хэрэгслийн хөдөлгөөнд хяналт шалгалтыг зохион байгуулж, хязгаарлалтуудыг хийх, тээврийн хэрэгслийг түр саатуулах, хариуцлага тооцох үйл ажиллагааг эрчимжүүлэх, энэ чиглэлийн үйлчилгээ үзүүлэгч байгууллагуудтай хамтран ажиллаж, иргэдийн эрх ашгийг хамгаалахад онцгой анхаарч ажиллахыг холбогдох байгууллагуудад чиглэл болгож байна.

Мөн эцэг эхчүүдийн зүгээс насанд хүрээгүй хүүхдэдээ энэ төрлийн тээврийн хэрэгсэл худалдан авч өгч, замын хөдөлгөөнд оролцуулахгүй байхыг уриалж, таны үр хүүхдийн болон бусдын амь нас, эрүүл мэндийг хамгаалахад Та бидний оролцоо чухал байгааг сануулж байна.

Нийслэлийн ИТХ-ын ээлжит VIII хуралдаанд оролцсон Нийслэлийн Засаг дарга бөгөөд Улаанбаатар хотын Захирагч, нийслэлийн удирдлагын баг, Хурлын Ажлын алба болон Засаг даргын Тамгын газрын хамт олондоо болон харьяа газар, хэлтсийн төрийн албан хаагчдадаа талархал илэрхийлье.

Та бидний өмнө хүлээсэн үүрэг, хийх ажил, өндөр хариуцлага байгааг дахин сануулж, ажлын өндөр амжилт хүсье.

Нийслэлийн ИТХ-ын Ээлжит VIII хуралдаан өндөрлөснийг мэдэгдье.

Эх сурвалж: khural.ulaanbaatar.mn