Улаанбаатарт 26 хэм дулаан

 Нутгийн баруун хэсгээр солигдмол, бусад нутгаар багавтар үүлтэй. Баруун зүгийн нутгийн зарим газраар бороо орно. Салхи баруун зүгийн нутгаар баруун хойноос, бусад нутгаар өмнөөс секундэд 6-11 метр, баруун болон төвийн нутгийн зарим газраар түр зуур секундэд 16-18 метр хүрч ширүүснэ. Алтай, Хангайн уулархаг нутгаар 17-22 градус, Увс нуурын хотгороор 20-25 градус, Орхон-Сэлэнгийн сав, говийн нутгийн баруун хэсгээр 25-30 градус, бусад нутгаар 22-27 градус дулаан байна.

УЛААНБААТАР ХОТ: Багавтар үүлтэй. Бороо орохгүй. Салхи зүүн өмнөөс секундэд 5-10 метр, зарим үед түр зуур секундэд 16-18 метр хүрч ширүүснэ. 25-27 градус дулаан байна.

Өглөө 05 цагт Улаанбаатарт: 8 градус дулаан, харьцангуй чийг 53 хувь, агаарын даралт 865 гектопаскаль байлаа. Даралт өдөртөө буурна.

Үерийн аюулаас сэрэмжлүүлэх мэдээ:

Өнөөдрийн байдлаар Хэнтэйн нуруунаас усжих Хүдэр, Тэрэлж, Сөгнөгөр, Онон, Хэрлэн голын эхээр усны түвшин өмнөх өдрийнхөөс 2-5 см нэмэгдэж, Хэрлэн гол Мөнгөнморьт сум орчмоор үерийн түвшинг 5 см орчим давсан байна. 6 дугаар сарын 11-нд Хэрлэн гол Багануур дүүрэг орчмоор усны түвшин хоногтоо 5 см нэмэгдэж, үерийн түвшинд хүрнэ. 6 дугаар сар гарсаар Хэрлэн, Хараа, Орхон, Сэлэнгэ мөрөнд бага насны хүүхдүүд усанд осолдох тохиолдол 4 удаа гарсан байна. Иймд дээр дурдсан голуудын сав дагуу нутаглаж буй ард иргэдийг үер усны аюулаас болгоомжтой байхыг онцгойлон анхааруулж байна.

эх сурвалж: цаг-агаар.мн