Монголын Залуучуудын Холбоо БХИС-тай хамтран ажиллах санамж бичигт гарын үсэг зурлаа

Монгол Улсын Ерөнхийлөгчийн 2010 оны 155  дугаар  зарлиг  болон Батлан хамгаалахын  сайдын 2013 оны 340 дүгээр  тушаалаар  батласан “Батлан хамгаалах салбар ба эх оронч үзэл” хөтөлбөрийн  хүрээнд Монголын Залуучуудын холбоо, Батлан хамгаалахын их  сургууль хамтран Монголын залуу үеийнхэнд цэрэг эх оронч үзэл, бие бялдар, эр зоригийн хүмүүжил олгох, тэднийг эх орнынхоо түүхээр бахархан хүндэтгэж, өвлөн үлдэх үзэлтэй болгох мөн залуучууд болон нийгэмд чиглэсэн төрөл бүрийн  төсөл хөтөлбөрүүд  хэрэгжүүлэх, арга хэмжээнүүд зохиох, нийгмийн сайн сайханд чиглэсэн аян өрнүүлэх урилга гаргах зорилготой хамтран ажиллах  санамж бичиг байгууллаа. Хамтран ажиллах санамж бичигт Монголын Залуучуудын Холбооны ерөнхийлөгч Аюушийн Мөнхбат, Батлан Хамгаалах Их Сургуулийн Я.Чойжамц нар гарын үзэг зурсан юм.

Энэхүү хамтын ажиллагааны хүрээнд эрүүл Монгол  залууг төлөвшүүлэх, залуучуудад  зориулсан орчин үеийн шийдэлтэй бие бялдар, эр зоригийн реалити шоу, аян өрнүүлэх, уриалга гаргах, “Өлчир чийрэг” хөтөлбөр, Залуучуудын дунд Монгол Улс, цэргийн түүхийг  сурталчлан таниулах өдөрлөг, лекц зохион байгуулах, Дэлхийн II дайны Ялалтын баярт Монгол залуучуудын татан оролцуулах төслийг хамтран  хэрэгжүүлэх гэсэн  дээрх  үндсэн  чиглэлүүдээр хамтран ажиллахаар болсон юм.

Монголын залуучуудын холбоо, Батлан хамгаалах яам хамтран Халх голын байлдааны ялалтын 75 жилийн ойн хүрээнд Монгол-Оросын залуучууд оролцсон “Дайчин нөхөрлөлийн замаар” тойрон аяллыг  өнгөрөгч  оны  наймдугаар  сард  амжилттай  зохион байгуулж,  Сэлэнгэ-Дархан-Орхон-Хэнтий-Дорнод аймгийн нутгуудаар аялаад  ирсэн  юм. Энэхүү  аялалд  оролцсон Монгол-Орос  залуус ч өндөр  сэтгэгдэлтэй  буцсан.

Тэгвэл  энэхүү  туршлага  дээрээ  үндэслэн Дэлхийн II дайны Ялалтын  баярт Монгол-Орос Залуусыг  татан  оролцуулахаас  гадна Хятад  залуусыг ч  уг  аялалд хамруулах тухай хэлэлцээр  хийгдэж  байгаа бөгөад уг  хэлэлцээр  амжилттай  болвол Монгол-Орос-Хятад  залуусын  хамтарсан аяллын  илүү өргөн  цар  хүрээнд  зохион  байгуулах юм байна

Ийнхүү 2 тал хамтран  ажиллах  санамж  бичиг гарын үсэг  зурах  ёслолын  ажиллагаанд  Монголын  Залуучуудын  холбооны  гүйцэтгэх  хорооны залуус,  Монголын Залуучуудын  холбооны  дэргэдэх  клубүүдын  гишүүд  оролцож Батлан хамгаалах их  сургуулийн үйл  ажиллагаа,  анги танхим, буудлагын  талбай, мөн  тус  сургуулийн  цэргийн  музейтэй танилцсан  юм.  Түүнчлэн Цэргийн  дуу  бүжгийн  чуулгын авьяаслаг  залуус урлагийн  тоглолтоороо бэлэг  барьж тус сургууль   дээр  хүрэлцэн  очсон  залууст  мартагдахааргүй  сайхан  дурсамж үлдээж  чадлаа.

эх сурвалж: www.myf.mn