Өглөө.мн Шинэ өглөө, Шинэ мэдээлэл
Сирээс дүрвэж яваад амиа алдсан гурван настай бяцхан хүүгийн зураг дэлхий нийтийг цочироож байна. Анх харахад унтаж буй мэт харагдавч бяцхан хүүгийн зүрх аль хэдийнээ зогссон байсан ба далайн давалгаа түүний амийг аль хэдийн аван одсон байжээ. Хүүг Алан Курди гэдэг байсан ба гэр бүлээрээ Сири улсаас дүрвэж байсан байна. Хоёр завьтай 23 хүн бүгд амь насаа алдсаны хамгийн бяцхан нь гурван настай Алан Курди юм. Түүний ээж, таван настай ах хоёр нь ч мөн амиа алджээ. Хүүгийн аав амьд үлдэж чадсан ч маш их уй гашууд автаж байгаа юм. Гуравхан настай бяцхан хүүд маш сайхан ирээдүй маш том зорилго байсныг хэн ч таашгүй. Түүний үхэлд хэн буруутай вэ? Сири улс уу? Эсвал иргэний дайн уу? Сүүлийн сар гаруйн хугацаанд л гэхэд Сири улсаас Европ руу зуу гаруй мянган хүн дүрвэсэн гэх тоон судалгаа байна. Гэхдээ үүний цаана хичнээн цагаачид дүрвэж яваад амиа алдсаныг бид мэдэхгүй. Хүүг дүрвэгсдийн билэг тэмдэг болгох талаар Цагаачдын холбоо хэлэлцэж байгаа бөгөөд Европын холбоо дүрвэгсдийн асуудал дээр НҮБ-д туслахаа мэдэгдээд байгаа юм. Гурван настай бяцхан хүүгийн амь нас бусдын өрөвч сэтгэлийг хөдөлгөөд өнгөрөх биш маш их үнэ цэнэтэй байх ёстой билээ. Хүүгийн зургыг харсан дэлхийн өнцөг булан бүрт орших иргэд хүүг амар тайван диваажингийн орон руу очоосой хэмээн түүний зургыг сахиусан тэнгэр мэт болгосон байна.
Б.Нарангэрэл
