Чингэлтэй дүүрэг, ОХУ-ын Улаан-Үд хотын Советский дүүрэг хамтын ажиллагааны санамж бичгийг 2015 оны 9 дүгээр сард байгуулсан. Эл санамж бичгийн хүрээнд хоёр дүүргийн Засаг даргын Тамгын газрын ажилтнуудын сургалт-зөвлөгөөнийг 10 дугаар сарын 21-23-ны өдрүүдэд Байгаль нуурын эрэг дээр зохион байгуулав.
Хоёр дүүргийн захиргааны ажилтнуудын нэгдсэн уулзалтын үеэр Чингэлтэй дүүргийн Засаг дарга Д.Ганболд, Советский дүүргийн захиргааны дарга А.И.Тулонов нар хоёр дүүргийнхээ онцлог, Засаг даргын Тамгын газруудын бүтэц зохион байгуулалтын харилцан товч мэдээлэл хийлээ.
Советский дүүргийн захиргааны дарга А.И.Тулоновын урилгаар болсон сургалт-зөвлөгөөний үеэр гол зорилго нь Чингэлтэй дүүргийн Засаг даргын Тамгын газрын мэргэжилтнүүд, Советскийн дүүргийн захиргааны мэргэжилтнүүдтэй харилцан, туршлага солилцох, цаашид хамтын ажиллагаагаа улам өргөжүүлэх юм. Мөн хоёр дүүргийн Засаг даргын Тамгын газрын мэргэжилтнүүдийн дунд хөлбөмбөг, гар бөмбөг, одон бөмбөгийн нөхөрсөг тэмцээн зохион байгуулсан юм.