Тост, тосон бумбын нуруунд ажилаад ирлээ

Улсын Их Хурлын Байгаль орчин, хүнс, хөдөө аж ахуйн байнгын хорооноос 2016 оны 01 дүгээр сарын 23-26-ны өдрүүдэд Өмнөговь аймгийн Гурвантэс сумын нутаг дэвсгэрт орших Тост, Тосон бумбын нурууг Улсын тусгай хамгаалалтад авах асуудлыг шийдвэрлэх, тус бүс нутгийг улсын тусгай хамгаалалтад хамруулах эсэх асуудлыг судалж, зохих дүгнэлтийг гаргах зорилгоор тус суманд Улсын Их Хурлын гишүүн, Байгаль орчин, хүнс, хөдөө аж ахуйн байнгын хорооны дарга Л.Эрдэнэчимэгээр ахлуулсан ажлын хэсгийнхэн нөхцөл байдалтай биечлэн танилцаад ирлээ. Ажлын хэсэгт Улсын Их Хурлын гишүүн Ц.Оюунгэрэл, Байнгын хорооны зөвлөх, Улсын Их Хурлын тамгын газрын хэвлэл мэдээлэл, Байгаль орчин, ногоон хөгжил, аялал жуулчлалын яамны Тусгай хамгаалалттай нутгийн удирдлагын газар, тус яамны хэвлэл мэдээллийн алба, Мэргэжлийн хяналтын ерөнхий газрын Байгаль орчны хяналтын хэлтсийн дарга, Уул уурхайн яамны газрын дарга болон ашигт малтмалын газар, газрын тосны газрын холбогдох мэргэжилтнүүд багтсан юм.

Ажлын хэсгийн бие бүрэлдэхүүн Өмнөговь аймгийн Гурвантэс сумын нутаг дэвсгэрт орших Тост, Тосон бумбын нурууг улсын тусгай хамгаалалтад авах талаар хийж буй болон төлөвлөсөн ажлууд, тулгамдаж буй асуудлын талаар орон нутгийн удирдлага, аж ахуйн нэгж байгууллага, иргэдийн санал, хүсэлтийг сонсох, бодитой хэрэгжиж буй ажлуудтай танилцаж, Байгаль орчныг хамгаалах багц хууль болон холбогдох бусад хуулийн хэрэгжилт, түүний хяналтын талаар орон нутгийн өөрөө удирдах байгууллагын удирдлагуудтай уулзаж, хууль зөрчиж үйл ажиллагаа явуулж байгаа аж ахуйн нэгж, байгууллагуудын талаар авч хэрэгжүүлсэн арга хэмжээ, тулгамдаж буй асуудлын талаарх саналыг сонсохын зэрэгцээ иргэд, төрийн бус байгууллагын төлөөлөлтэй уулзаж санал солилцлоо. Ажлын хэсгийнхэн Өмнөговь аймгийн Гурвантэс сумын нутаг дэвсгэрт орших Тост, Тосон бумбын нурууг улсын тусгай хамгаалалтад авахдаа аль болох экосистемийг бүхэлд нь хамруулах зайлшгүй шаардлагатай гэсэн саналуудыг гаргасан юм.