Төрийн албаны шалгалт эхлэхэд 10 хоног үлдлээ

Нийслэлийн нутгийн захиргааны байгууллагаас төрийн жинхэнэ албан тушаалын сул орон тоог нөхөх, сонгон шалгаруулах ээлжит мэргэшлийн шалгалт энэ сарын 24-нд болох гэж байна. Уг мэргэшлийн шалгалтад орохыг хүссэн иргэдийг Нийслэлийн нутгийн захиргааны III байр буюу “Улаанбаатар хотын Бизнес хөгжлийн төв”-ийн /Зоос гоёлын үйлдвэрийн замын урд талд/ II давхрын үзэсгэлэнгийн танхимд энэ сарын 19, 20-ны өдрийн 09.00-13.00, 14.00-17.00 цагийн хооронд бүртгэх аж.

Шалгалт өгөх иргэд материал бүрэн бүрдүүлсэн байх шаардлагатай юм байна.

Тодруулбал, Төрийн албан хаагчийн анкет (Төрийн албан хаагчийн анкетыг маягт N1-ийн дагуу бүрэн бөглөсөн байх), Боловсролын төвшинг тодорхойлсон баримт бичиг /диплом/-ийн эхийг нотариатаар гэрчлүүлсэн хуулбарын хамт, ажил байдлын тодорхойлолт, Иргэний үнэмлэхний эх, хуулбарын хамт, “3 х 4”-гийн хэмжээний цээж зураг дөрвөн хувь, ажилласан хугацаа болон ажил эрхлэлтийг гэрчлэх баримт /Нийгмийн даатгал, хөдөлмөрийн дэвтэр/-ийн эх хувийг авчирч бүртгүүлэх гэнэ. 

Бүртгүүлсэн иргэд энэ сарын 24-ний өдөр 07.30 цагт шалгалт авах Сүхбаатар дүүргийн 71 дүгээр сургуулийн хойно байрлах “Гэгээрэл хөгжил төв”-ийн байранд ирсэн байх бөгөөд шалгалт 08.00 цагаас эхлэх аж.

Анхаарах зүйл шалгалтад орох иргэд иргэний үнэмлэхээ заавал авчрах шаардлагатай аж.