Өглөө.мн Шинэ өглөө, Шинэ мэдээлэл
Эрүүл мэндийн яамнаас коронавирусийн халдвар, урьдчилан сэргийлэх арга хэмжээний талаар цаг үеийн мэдээлэл хийлээ.
2020 оны хоёрдугаар сарын 4-нд Дархан-Уул аймагт тусгаарлагдсан болон ХӨСҮТ-д тусгаарласан хоёр иргэний шинжилгээний хариу сөрөг буюу шинэ корона вирусийн халдвар илрээгүй байна. Харин Орхон аймагт тусгаарлагдсан иргэний сорьц өчигдөр орой ХӨСҮТ-д ирсэн учраас өнөөдөр шинжилгээний хариу гарах юм .
ДЭМБ-ийн мэргэжилтэн О.Ариунтуяа“Өнөөдрийн 08:00 цагийн мэдээгээр 28262 тохиолдол бүртгэгдэж, 565 хүн нас барж, сэжигтэй тохиолдол 3708-аар нэмэгдсэн байна. Хятадаас гадна 24 улсад 191 тохиолдол бүртгэгдсэнээс Филиппинд нас баралтын нэг тохиолдол гарсан.
Бэльги улсад шинэ корона вирусийн тохиолдол анх удаа бүртгэгдсэн. ДЭМБ-аас эмч, эмнэлгийн ажилтнуудад зориулсан хувцас хэрэгсэлийг Номхон далайн баруун бүсийн агуулахад төвлөрүүлээд байна. Монголд энэ сарын 8-нд ирэх хуваарьтай байгаа” гэж мэдэгдлээ.
ХӨСҮТ-ийн захирал Д.Нямхүү “Өчигдөр буюу хоёрдугаар сарын 5-нд ХӨСҮТ-д гурван сэжигтэй тохиолдол тусгаарлагдсан. Тодруулбал, Хоёрдугаар сарын 5-ны Сөүл-Улаанбаатарын нислэгээр ирсэн Австрали улсын иргэн, Токио-Улаанбаатарын нислэгээр ирсэн монгол иргэн, мөн нэгдүгээр сарын 31-нд Замын-Үүд боомтоор галт тэргээр амьсгалын замын өвчний шинж тэмдэг илэрсэн монгол иргэн ирсэн.
ХӨСҮТ-д хоёрдугаар сарын 5-ны 17:00 цагийн байдлаар долоон сэжигтэй тохиолдлыг тусгаарлаад, тандалт судалгаа, лабораторийн шинжилгээ хийгдэж байна” гэв.
Замын-Үүд боомтоор өчигдөр орж ирсэн хоёр иргэн согтуу хил нэвтэрсэн байна. Орхон аймагт өрхийн эмнэлэгтээ өөрөө хандаж очсон иргэн мөн согтууруулах ундаа хэрэглэсэн байжээ. Улмаар эмч, эмнэлгийн ажилтнуудын зүй ёсны шаардлагыг биелүүлэхгүй байх, хэл амаар доромжилсон үйлдэл гарсан тул цагдаагийн байгууллагаас хариуцлага тооцно гэдгийг ЦЕГ-аас анхаарууллаа. Харин Бээжин-Улаанбаатар-Москва чиглэлийн галт тэрэг өнөөдрөөс зогсож байна. Мөн нислэгүүдийг зогсоосон байна.
Цагдаагийн байгууллагаас эм, эмнэлгийн хэрэгслийг зах зээлийн үнээс өндөр үнээр худалдаалж байгаа тохиолдолд хариуцлага хүлээлгэхийг хэллээ.
ЭМЯ-наас иргэддээ олон хүн цугласан газар очихгүй байх, зайлшгүй шаардлага гарсан бол амны хаалт зүүж гараа байнга ариутгахыг зөвлөж байна.
