Өглөө.мн Шинэ өглөө, Шинэ мэдээлэл
Их Британийн ерөнхий сайд Борис Жонсон болон түүний сүйт бүсгүй нар саяхан мэндэлсэн хүүдээ нэр хайрлалаа. Хүүгийн нэрэнд Борис Жонсоныг кронавирусын халдвараас эмчилсэн эмчийн нэрийг оруулжээ.
Их Британийн Ерөнхий сайд Борис Жонсон, түүний сүйт бүсгүй Кэрри Симондс нар саяхан төрсөн хүүдээ Уилфред Лори Николас Жонсон хэмээх нэр хайрласан байна. “Бид өөрсдийн өвөө болон Б.Жонсоныг эмчилсэн эмч нарт хүндэтгэл үзүүлэн энэхүү нэрийг сонгосон” гэж К.Симондс “Instagram” хуудсандаа бичээд, хүүгээ тэвэрсэн зургийнхаа хамт нийтэлжээ.
Мөн К.Симондс Лондон хотын “University College” эмнэлгийн хамт олонд талархал илэрхийлээд, би маш их аз жаргалтай байна хэмээн бичсэн байна. Б.Жонсон коронавирусний халдвар авсны улмаас эрчимт эмчилгээний тасагт хэвтээд гарсны дараахан түүний сүйт бүсгүй амаржсан юм.Б.Жонсон хүүхэд асрах амралт авна хэмээн өмнө нь ярьж байсан боловч цар тахалтай тэмцэж буй үед ийм шийдвэр гаргахгүй ажээ. Тэрбээр энэ оны сүүлээр хүүхэд асрах “богино” амралт авах төлөвтэй байна гэж Даунинг-Стрит мэдээлжээ.
Ерөнхий сайд биеийн байдлаа маш хүнд байсан талаар “Sun” сонинд ярилцлага өгөх үеэрээ хэлжээ. “Намайг амьдруулахад олон литр хүчилтөрөгч шаардагдсан гэж тэрбээр хэлээд, эмнэлэгт долоон хоног хэвтэхэд хөл дээрээ эргэн зогсож, бусдыг аврахыг маш их хүссэн хэмээн ярьсан байна. Түүнчлэн Б.Жонсоныг эмнэлэгт байхад “болзошгүй нөхцөл байдлын төлөвлөгөө” боловсруулсан байжээ. Ерөнхий сайдын коронавирусний шинжилгээ гуравдугаар сарын 26-нд эерэг гарч, 10 хоногийн дараа эмнэлэгт хүргэгдсэн. Энэхүү үйл явдлаас нэг өдрийн дараа түүнийг эрчимт эмчилгээний тасаг руу шилжүүлж, тэрбээр тэнд гурван хоногийг өнгөрүүлсэн юм.
