УИХ-ын гишүүн Р.Амаржаргалын “өвөрмөц” хүсэлт

УИХ-ын гишүүн болохын төлөө  “үхэн хатан” тэмцдэг гэдгийг мэддэг Монголчууд бидэнд УИХ-ын гишүүний бүрэн эрхээс татгалзан, гишүүнээс болих хүсэлтийнхээ  төлөө тууштай “тэмцэж байгаа”  өвөрмөц хүсэлтийн тухай мэдээлэл чих дэлдийлгэв.

Учир юу гэвэл, 2012 оны УИХ-ын сонгуулиар  23-р тойрог буюу  Сүхбаатар л дүүрэгт АН-аас нэр дэвшин  ялалт байгуулж  гишүүн болсон Р.Амаржаргал  намын үүрийн харьялалынхаа дагуу Ховд аймгийн АН-ын дарга Д.Цэвээнравданд УИХ-ын гишүүнээс чөлөөлөгдөх өргөдлөө бараг сарын өмнө өгсөн билээ. Тэрээр  өргөдөлдөө намын  дүрэм болон бүтцийн үйл ажиллагаанд шүүмжлэлттэй хандаж байгаагаа илэрхийлээд ийм нөхцөл байдлын дунд үргэлжлүүлэн ард түмний төлөөлөл болж УИХ-д ажиллаж чадахгүй гэдгээ мэдэгдэж байсан. Түүний эл хүсэлтийг АН-ын журмын нөхөд л үл зөвшөөрөн “намдаа парламентын суудал авч ирсэн, намын шилдэг кадруудын нэг тул таны хүсэлтийг хүлээн авах боломжгүй” гэсэн утга санаа бүхий шийдвэрийг танилцуулжээ. Гэсэн хэдий Р.Амаржаргал гишүүн  эл байдлыг үл тоон 3 хоногийн өмнө УИХ-ын дарга З.Энхболдод  УИХ-ын гишүүнээс татгалзах хүсэлтээ албан ёсоор  гаргажээ. 

Тэрээр  хүсэлтэндээ УИХ-ын тухай хуулийн 6 дугаар зүйлийн 6.6.3 -ийг үндэс болгосон байх юм. Тэгвэл  эл  хуулийн “6.6. Дор дурдсан тохиолдолд гишүүний бүрэн эрх энэ хуулийн 6.3-т заасан хугацаанаас өмнө дуусгавар болно” гээд  “6.6.3-д: гишүүн өөр ажилд шилжих болон хүндэтгэн үзэх бусад шалтгаанаар чөлөөлөгдөх  хүсэлтээ  өөрөө гаргасныг Улсын Их Хурал хүлээн авсан;  тохиолдолд” гэж хуульчлан тогтоожээ. Одоо түүний эл хүсэлтийг УИХ-ын гишүүд   хүлээн авсан тохиолдолд Сүхбаатар дүүргийн 23-р тойрогт УИХ-ын гишүүний нөхөн сонгууль болох  юм байна. Сонирхолтой нь түүний эл хүсэлтийн  талаар АН-ын дарга Н.Алтанхуяг өдийг хүртэл  ямар нэгэн байдлаар байр сууриа илэрхийлээгүй  байгаа бөгөөд энэ талаар асуусан сэтгүүлчдийн асуултанд ихэд ундууцан, “та нар өөрсдийнхөөрөө ойлго”  гэж хариулжээ.

А.Галт