Өглөө.мн Шинэ өглөө, Шинэ мэдээлэл
“Хэрэг хуучирдаггүй, хэрээ цагаан болдоггүй” гэдэг. УИХ-ын гишүүнээр 2-3 удаа дараалан сонгогдсон, ярьж хэлэх бүрдээ “хулгай худлаас ангид, нэр цэвэр” гэж хэлэх, шударга улс төрчийн имижийг бүрдүүлэхийг зорьдог нэр бүхий УИХ-ын 2 гишүүнтэй холбоотой НОЦТОЙ мэдээллийг бид баримтанд тулгуурлан цувралаар хүргэхээр бэлтгэж байна.
Бидэнд байгаа эдгээр баримтууд нь тэдний ХЭН болох тухай “үнэн нүүр царайг” илчилж, тэднийг эрх мэдэл, албан тушаалаа хэрхэн ашиглаж хөрөнгөжсөн, ах дүү, амраг садан, хамаарал бүхий этгээдүүдээрээ дамжуулан яаж төсвийн мөнгийг “зувчуулж” ирсэн тухай “өгүүлэх” юм.
Товчхондоо тэдний тухай бид биш “БАРИМТ” ярих болно.
Энэ хоёр гишүүний нэг нь Булган аймагт 2016, 2020, 2024 онд МАН-аас дэвшин ялалт байгуулж, өдгөө УИХ-ын гишүүнээр нийт 9 дэх жилдээ сонгогдон ажиллаж байгаа Жадамбын Бат-Эрдэнэ бол нөгөөх нь Хан-уул дүүргээс 2 дах удаагаа УИХ-ын гишүүнээр сонгогдсон, ХҮН намын дарга, Монгол Улсын Шадар сайд Тогмидын Доржханд нар юм.
Эхний удаад бид УИХ-ын гишүүн Ж.Бат-Эрдэнийн тухай баримт түшин мэдээлэл хүргэе.
Ж.Бат-Эрдэнэ гишүүний намтарыг харвал тэрбээр 2007-2012 онд Зам тээврийн яамны төрийн нарийн бичгийн даргын үүрэгт ажлыг хийж гүйцэтгэж байсан байдаг. Мань эр тэр үед буюу 2007 онд “Эм Эм Зэт Жэй” ХХК-ийг байгуулан хожим 2018 оны 03 сард өөрийн төрсөн ах Жадамбын Батсайханд хувьцаагаа шилжүүлсэн байна.
Ж.Бат-Эрдэнэ Зам тээврийн яамны төрийн нарийн бичгийн даргаар ажиллаж байхдаа өөрийн хамаарал бүхий “Эм Эм Зэт Жэй” ХХК дээрээ Байгаль орчин, аялал жуулчлалын сайдын 2011 оны 06 сарын 15-ны өдрийн А-198 тоот тушаалаар Богдхан уулын дархан цаазат газрын Нүхтийн аманд аялал жуулчлалын зориулалтаар ашиглахаар 201189 тоот дугаар бүхий гэрчилгээг БОАЖ-аас гаргуулж авсан байдаг.
Дараа нь 2016 оны 06 сард Нийслэлийн Ерөнхий төлөвлөгөөний газрын дарга О.Одбаярын гарын үсэг бүхий Архетиктур төлөвлөлтийн даалгаварыг “Эм Эм Зэт Жэй” компанийн зөвшөөрөл бүхий Богд уулын Арцадын амны 10 га газар дээрээ “АМРАГЧДЫН ОРОН СУУЦ” нэрээр 8 блок 12-16 давхар орон сууц барилга барихаар гаргуулж авчээ.
Энгийн иргэн, аялал жуулчлалын жижиг компаниуд Улсын тусгай хамгаалалттай Богдхан уулын аманд аялал жуулчлалын зориулалтаар газар эзэмшдэг ч зориулалтын дагуу үйл ажиллагаа явуулаагүй, газрын төлбөрөө төлөөгүй жил өнжсөн, байгаль хамгаалах, нөхөн сэргээх төлбөрөө төлөөгүй зэрэг олон шалтгааны улмаас газар ашиглах эрхийг нь цуцалж, гэрчилгээг нь хүчингүйд тооцдог.
Тэгвэл Ж.Бат-Эрдэнэ УИХ-ын гишүүний эрх мэдэл, албан тушаалын нөлөөгөө ашиглан өөрийн хамаарал бүхий “Эм Эм Зэт Жэй” ХХК-ий нэр дээрээ 2011 онд авсан Арцадын ам дах 10 га газрын төлбөрөө 2011-2018 онуудад төлөөгүй явж ирсэн гэх бөгөөд уг асуудлыг нь тухайн үедээ “Эм Эм Зэт Жэй” ХХК-ийн гүйцэтгэх захирлаар ажиллаж байсан Ж.Бат-Эрдэнийн төрсөн дүүгийн нь эхнэр Б.Баярмагнай, Хуулийн зөвлөх Б.Шинэбаатар нар БОАЖЯ-аар “гүйж” аргалдаг байжээ.
Ингэж Ж.Бат-Эрдэнэ эрх мэдэл, албан тушаалаа урвуулан ашиглаж, хэн хүнд олддоггүй Богдхан уулын улсын тусгай хамгаалалттай газарт аялал жуулчлалын зориулалтаар АМРАГЧДЫН ОРОН СУУЦ барих нэрээр 10 га газар авч орон сууцны 16 давхар хороолол барих ажлыг эхлүүлж ГАЗРЫН НАЙМААНД гүнзгий ГАР ДҮРСЭН нэгэн аж.
Ж.Бат-Эрдэнэ гишүүн өөрийн хамаарал бүхий “Эм Эм Зэт Жэй” ХХК компаниа өнгөрсөн оны 4 сард МонКон группын захирал Б.Амартөвшинд шилжүүлсэн байдаг. “Шилжүүлсэн” ч гэж дээ “худалдсан” гэж хэлбэл илүү онох байх. Ямар үнээр яаж шилжүүлсэн тухай бид тусад нь нийтлэл болгох хүргэнэ.
Эрх мэдэл, албан тушаалаа ашиглаж, хамаарал бүхий этгээдүүдээр дамжуулан Богд ууланд их хэмжээний газар эзэмшиж, өөрөө тэндээ хаус орон сууц барьж амьдран, газраа бусдад зарж борлуулж, их хэмжээний ашиг олж, дээр нь төсвийн хөрөнгийг ТӨСӨЛ нэрээр завшиж ирсэн ч “хумсаа нуусан муур шиг” чимээгүй амьдарч ирсэн Ж.Бат-Эрдэнийг УИХ-ын Төрийн байгуулалтын байнгын хорооны даргаас нь нэн даруй чөлөөлж, гишүүнээс нь эргүүлэн татах асуудлыг бид УИХ-ын дарга Д.Амарбаясгалан, МАН-ын дарга, Ерөнхий сайд Л.Оюун-Эрдэнэ нарт хандан хөндөж тавихын зэрэгцээ АТГ, ЭЦГ зэрэг хуулийн байгууллагад түүнийг шалгуулахаар бүх баримтаа хүлээлгэн өгөх болно.
Үргэлжлэл бий…
М.Баатар
