“Оюутан цэрэг” хөтөлбөр хоёрдугаар ээлжийн нээлтээ хийлээ

Нийслэлийн Засаг даргын Санхүү, эдийн засгийн асуудал хариуцсан орлогч Н.Батаа гуравдугаар сарын 3-нд “Оюутан-Цэрэг хөтөлбөр хэрэгжүүлэх тухай” захирамж гаргасан. Уг захирамжаар Монгол Улсын Батлан хамгаалахын сайд, Боловсрол, шинжлэх ухааны сайдын хамтарсан А/49, А/56 дугаар тушаалыг хэрэгжүүлэх, нийслэлийн нутаг дэвсгэр дэх их, дээд сургуульд суралцаж буй 18-25 насны оюутан залуучуудыг сайн дурын үндсэн дээр элсүүлэх Оюутан-Цэрэг хөтөлбөрийг 2015 оны гуравдугаар сарын 10-ны өдрөөс эхлэн хэрэгжүүлэх ажлыг зохион байгуулахыг үүрэг болгосон байна.

“Оюутан цэрэг” хөтөлбөрийг Монгол Улсын Ерөнхийлөгч Ц.Элбэгдорж анхлан санаачилж байсан бөгөөд өнгөрсөн жилүүдэд тун амжилттай хэрэгжсэн билээ. “Оюутан цэрэг” хөтөлбөр анх 2014 оны 3-р сарын 17-ны өдөр нээлтээ хийж, 42 улсын болон хувийн их дээд сургуулиудын 418 оюутан тус хөтөлбөрт хамрагдаж байсан. Тэгвэл өнөөдөр эл хөтөлбөрийн хоёрдугаар ээлжийн 2015 оны нээлтийн үйл ажиллагаа МҮИС-д болж өндөрлөлөө. Тус нээлтийн арга хэмжээг НЗДТ-ийн газар, Монголын оюутны холбоотой хамтран зохион байгууллаа.

Энэ оны хувьд 1000 оюутан цэргийг бэлтгэх зорилготой байгаа бөгөөд их, дээд сургуулийн 1-р курсын 18-25 насны эрэгтэй оюутнууд, 2-р курсын 18 настай эрэгтэй оюутнуудыг 2015 оны 3-р сарын 9-ны өдрөөс сургуулийн сургалтын албан дээр бүртгэж эхлээд байна.

Ш.Ганчимэг