“Аялал жуулчлал ба ажил эрхлэлт” хөдөлмөрийн яармаг боллоо

7 дахь жилдээ зохион байгуулагдаж буй тус яармагийн үеэр ажлын байрны захиалга ирүүлсэн 400 гаруй байгууллага, аж ахуйн нэгжийн 2464 ажлын байр зарлагдсан бөгөөд “Найрсаг Улаанбаатар” хөтөлбөрийн хүрээнд хоёр дахь жилдээ хэрэгжих “Жуулчдад ээлтэй оюутан цагдаа” хөтөлбөрт хамрагдах хүсэлтэй оюутан залуусыг бүртгэлээ. Аялал жуулчлалын салбарт ажиллах сонирхолтой оюутан залуус, идэвхтэй ажил хайгч иргэдийг эзэмшсэн мэргэжлийнхээ дагуу түр болон байнгын ажлын байртай болох нөхцөлийг хангах, аялал жуулчлалын байгууллагуудад шаардлагатай байгаа мэргэжлийн ажилтнаа олоход нь дэмжлэг үзүүлэх зорилгоор явагдсан үзэсгэлэнд биечлэн оролцож амжаагүй иргэд ажлын байрны мэдээллийг 5 дугаар сарын 11-ний өдрөөс эхлэн нийслэлийн Аялал жуулчлалын газрын Жуулчны мэдээллийн төвийн 70108687 утсаар авах боломжтой гэж нийслэлийн Аялал жуулчлалын газраас мэдээллээ.