Ц.Элбэгдорж ерөнхийлөгчийн тангаргаа өргөлөө

 УИХ-ын дарга З.Энхболд хүндэтгэлийн чуулганыг нээж “УИХ-ын хүндэтгэлийн чуулган нээснийг мэдэгдье. Чуулганы ирц 90,7 хувьтай буюу 69 гишүүн чуулганд оролцож байна. чуулганд хүрэлцэн ирсэн гишүүд, зочид төлөөлөгчид болон ард иргэддээ талархал илэрхийлэе. Монгол Улсын Ерөнхийлөгчийн сонгуульд Цахиагийн Элбэгдорж ард түмний дийлэнх олонхийн саналыг авч, ялсан бөгөөд энэ удаагийн тангараг өргөх ёслолыг анх удаагаа ард түмнийхээ өмнө нээлттэй хийж буйгаараа онцлог” хэмээн үг хэлэв.

Үүний дараагаар Монгол Улсын Ерөнхийлөгч Ц.Элбэгдоржийг хүндэтгэлийн индэрт урьсан юм. Ерөнхийлөгч Ц.Элбэгдорж хүндэтгэлийн индрээс “Монгол Улсын тусгаар тогтнол, бүрэн эрхт байдал, ард түмнийхээ эрх чөлөө, үндэсний эв нэгдлийг эрхэмлэн хамгаалж, Үндсэн хуулийг дээдлэн сахиж, Ерөнхийлөгчийн үүргийг шударгаар биелүүлэхээ батлан тангараглая” хэмээн ард түмнийхээ өмнө тангаргаа өргөж, Монгол Улсын Ерөнхийлөгчийн тамга, тэмдгээ хүлээн авлаа.

Талбайд цугласан иргэд зочид төлөөлөгчид бүгд ерөнхийлөгчид баяр хүргэн алга нижигнүүлэн ташицгаасан бөгөөд үүний дараагаар Монгол улсын төрийн дуулал эгшиглэн бүгд хүндэтгэл илэрхийлэв.

Л.Бадрах