Сонгуулийн сурталчилгаанд мөнгө тарааж байвал иргэн та баримтжуулан аваарай

Иргэдийн ам дамжсан элдэв яриа, цуурхал үнэний ортой эсэхийг мэдэхгүй юм. Ямар ч байсан зарим нэр дэвшигчид сонгуулийн санал өгөх өдөр өөрийг нь дугуйлсанаа гар утсаараа зураг авч баримтжуулбал 50 000- 100 000 төгрөг өгнө гэсэн цуурхал газар аваад байна. Мөн ах, дүү, хамаатан садан тухайн хороо, дүүрэгт амьдардаг хүний санал өгөлтөнд нөлөөлж мөн үүнийгээ баталгаажуулбал бас л мөнгө “төлөх” сураг гараад байна.

 Нэр дэвшигчид сурталчилгааны материалаа тарааж байгаа энэ үед тараах материал дотор мөнгө хийсэн байсан гэсэн яриа ч байгаа юм. Хэрэв иргэн танд тийм мөнгөтэй материал ирвэл шууд сонгуулийн ерөнхий хороонд баримтжуулан хүргэх ёстой. Учир нь тэдний тараасан 20 000 төгрөгнөөс илүү эх орон, тусгаар тогтнол үнэтэй болохоор тэр.

Мөн сонгуулийн ерөнхий хороо хэрэв хөдлөшгүй баримтаар тогтоогдвол нэр дэвшигчийн эрхийг цуцлах, таныг шагнах, хууль хүчний байгууллагаар шийдвэрлүүлэх болно. Тиймээс иргэн та саналаа худалдаж болохгүйн дээр энэ мэт гэмт хэргийг илрүүлбэл санал худалдан авалтанд автахгүй гэсэн үг. Мөнгө төлж УИХ болон НИТХ-д гишүүн болно гэдэг угаас хууль зөрчсөн хэрэг. Тиймээс та элдэв бэлэг, цуу ярианд автахгүйгээр өөрийн саналаа өгөөрэй.

Хэрэв ийм яриа үнэний ортой хэсэгт очвол нэр дэвшигчийн ярьж хэлж байгааг бичлэг хийн, зургаар баримтжуулан аваарай. Бид зөв сонголт хийх ёстой болохоос өнөөдрийн мөнгөнд хууртах учиргүй юм шүү.

Б.Саран