БНСУ-ын Үндсэн хуулийн цэцийн шийдвэрийг эсэргүүцсэн жагсаалын үеэр хоёр хүн нас баржээ

Өмнөд Солонгос улсын Үндсэн хуулийн цэц өчигдөр тус улсын Ерөнхийлөгч Пак Гын Хег огцруулах шийдвэр гаргасан билээ.

    Үндсэн хуулийн цэцийн гадаа болон Ерөнхийлөгчийн ордны гадаа уг шийдвэрийг дэмжсэн болон эсэргүүцсэн талууд цугларч тайван жагсаал хийж байсан юм.

    Гэвч Ерөнхийлөгч Пак Гын Хег огцруулах шийдвэр гарсны дараа түүнийг дэмжиж байсан олон нийтийн байгууллага болон иргэд уг шийдвэрийг эсэргүүцэж Засгийн газрын ордон, Ерөнхийлөгчийн ордон болон Үндсэн хуулийн цэцийн байрууд руу нэвтрэх оролдлого хийсэн юм.

    Цагдаагийн газраас уг газруудыг хамгаалалтад авсан ч эсэргүүцлийн жагсаалд оролцогсод хамгаалалтын бүсийг нэвтрэх оролдлого хийсээр байв.

   Ингээд эмх замбараагүй байдлын үеэр хоёр хүн нас барсан ба 70 орчим насны нэг иргэн толгойдоо гэмтэл авсан байдалтайгаар эмнэлэгт хүргэгдсэний дараа нас барсан бол, мөн насны өөр нэгэн эрэгтэй хүний зүрх гэнэт зогссоны улмаас эмнэлгийн тусламж авсан ч нас барсан байна.