Киргизийн парламент дахь сөрөг хүчний тэргүүнд шүүхээс ял оноолоо

 

Киргиз улсын парламент дахь сөрөг хүчний тэргүүн, социалист Ата-Мекен (“эх орон”) намын дарга Омурбек Текебаевт ял оногдуулсан тухай тус улсын Үндэсний аюулгүй байдлын хороо (ҮАБХ)-ноос мэдээлсэн байна.

Тухайлбал, ҮАБХ-ноос: “Омурбек Текебаев болон Онцгой байдлын дарга асан Дуйшонкулу Чотонов нарыг Киргиз улсын Эрүүгийн хуульд заасан хахуулийн гэмт хэрэгт сэжиглэн шалгаж, шүүхийн хэргийг эцэслэн шийдвэрлэлээ” гэжээ. Тус хороо нь энэ оны 2-р сарын 25-нд Омурбек Текебаев болон бусад этгээдийг хахууль, залилангийн гэмт хэрэгт сэжиглэн шалгаж, маргааш нь Текебаев болон Чотонов нарыг баривчлах тухай шийдвэр гаргуулсан байна.

Текебаевын хувьд 2010 онд Засгийн газрын тэргүүний орлогчоор ажиллаж байхдаа Оросын нэгэн бизнес эрхлэгчид “Альфа телеком” компанийг авч өгөхөөр амлаж, 1 сая ам.доллар хахуульд авчээ. Гэсэн ч тэрээр амалсандаа хүрч чадаагүй бөгөөд Оросын бизнес эрхлэгч мөнгөө буцааж авъя гэхэд нь тэр эргүүлж өгөөгүй байна.

Байцаагч нарын мэдээлснээр, түүний хахууль авах хэрэгт нь Онцгой байдлын дарга, Өмнөд Солонгос, Вьетнам улсад Элчин сайдаар ажиллаж байсан Чотонов гэгч оролцжээ.

Киргизийн парламентын гишүүд халдашгүй дархан эрхтэй байдаг бөгөөд тус улсын хуулиар гишүүн хүн авлига гэх мэтийн хүнд төрлийн гэмт хэрэг үйлдсэн бол дархан эрх нь цуцлагддаг юм байна.

АТГ