ТОСК-ийн захирал асан А.Гантулгыг баривчилжээ

Авлигатай тэмцэх газар /АТГ/-аас Төрийн орон сууцны корпораци /ТОСК/-ийн захирал асан А.Гантулгыг баривчилжээ. Түүнийг өнгөрөгч мягмар гариг буюу энэ сарын 25-ны өдөр баривчилж, цагдан хорих 461 дүгээр ангид хорьсон байна. АТГ-аас А.Гантулгыг ТОСК-ийн ерөнхий захирлаар ажиллаж байхдаа албан тушаалын байдлаа урвуулан ашиглаж улсад улсад их хэмжээний хохирол учруулсан, улсын мөнгө шамшигдуулсан гэх хэргээр саатуулсан байна.

Түүнийг “Үндэсний барилга консорциум” ХХК-ийн захирал Д.Цэндтэй 2013 оны арваннэгдүгээр сард хөрөнгө оруулалт, хамтын ажиллагааны гэрээ байгуулж их хэмжээний мөнгө олгосон гэж үзэж байгаа аж. Мөн нөгөө консорциум нь ямар ч ажил гүйцэтгээгүй гэнэ. Ямартай ч, ТОСК-ийн захирал асан А.Гантулгыг хууль хяналтын байгууллагаас шалгаж эхэлсэн тухай мэдээлэл гарч байсан юм.

Тэгвэл АТГ-ынхан хэргийн үзүүрээс атгасан бололтой, А.Гантулгыг гэм буруутай гэж үзэн саатуулаад байна. Өмнө нь гарч байсан мэдээллээр А.Гантулга ТОСК-ийн захирлаар ажиллаж байхдаа танил талдаа давуу байдал олгож, зээл өгч, их хэмжээний мөнгө үрэн таран хийсэн гэгдэж байсан юм.

Нинж