Энэ бол Америкийн “Хулсан ташуур” маягийн эртний түүхтэй дуу

Тийм ээ.

Энэ бол Америкийн “Хулсан ташуур” маягийн эртний түүхтэй дуу.

Мань хүн /Курт Кобайн/ энэ дууг MTV –ийн Unplugged тоглолтдоо коверлож дуулсан дуу.

Дуулалт, тоглолт бол 100% гүйцэтгэлтэй дуулсан дуу.

Магад дахиж энэ дууг ингэж дуулах дуучин мөд төрөхгүй биз.

Түүний сүүлчийн мөр

— “I would shiver the whole night through” — гэж хашхирч, гитарынх нь чимээ тасардаг тэр мөч бол үнэхээр зүрх шимшрэм.

Курт Кобейны сүүлчийн үг захиас мэт санагддаг дуу.

Харамсалтай нь, 1994 оны 4-р сарын 5-нд Курт Кобейн явсан, явахдаа домог болоод явж одсон.

Тэр бол миний хувьд шаргал үстэй, тамхи зуусан сахиусан тэнгэр.

– Энэ бол бөмбөр хийгээд гитарын хослолыг морин хийлийн бүгтхэн хийгээд тасралтгүй гунигт хэмнэлээр хооронд нь шаглаж урласан уй гунигийн төгс бүтээл.

– Энэ бол сэтгэлийн бүх өвчин шаналал, ганцаардал, айдас хүйдэст хүлэгдсэн бие сүүлийн хүлээсний олс тасарч огцом тэсэрч буй эгшин.

– Энэ бол харуусал гунигт багалзуурдуулан унах мөч.

– Энэ эр хүний хашхираан.

– Энэ бол цээжин дотор тогтож өгөхгүй шаналгах хар бараан нүүгэлтэх тортгийг гаргаж чадахгүй шаналах зовлон. Гараа амандаа тохойгоо хүртэл хийж тэрхүү тортгийг авч хаяхыг хүсэвч хурууны өндөгт мэдрэгдэх ч баригдахгүй байх тэр зовлон.

– Энэ бол ханын цаас болоод шал таазны хагархай зураас бүхэн ямар нэгэн дүрсийг илэрхийлэх утга нэхэх мэт харах тоолонд харц булаан гөлрөн суух мэдрэмж.

– Энэ дуу хамаг биеийн босох шар үсээр минь чавхдас хийн тоглохыг мэдрэх өвдөлт.

– Энэ дуунд уусах мөчид чи ер бусын өгөгдөлтэй төрсөн энэ дууны нэгээхэн хэсэг гэж чихэнд чинь шивнэхийг сонсох мэдрэмж.

– Энэ дуунаас мэдрэх бүх мэдрэмж бол жинхэнэ яруу найраг.